Recuperación dos primeiros utilitarios para fomentar as rutas turísticas pola nosa comarca

A memoria dos «turismos» que hai 35 anos corrían, dentro das súas posibilidades, polas nosas estradas está a ser recuperada en Monforte polo Club Autoclásico Ribeira Sacra, que se presentou en sociedade o pasado 9 de marzo cunha «quedada» dalgúns dos utilitarios na explanada da Compañía. Apadrinando o evento, o alcalde Severino Rodríguez amosou a súa curiosidade por estes vehículos, así como os paseantes que nesa mañá de choiva se achegaron á praza para ver de cerca estes clásicos do motor.

UNHA VINTENA DE SOCIOS UNIDOS POLOS COCHES CLÁSICOS

Según explica José Antonio Castro, presidente do Club Autoclásicos Ribeira Sacra, esta asociación naceu en agosto de 2012, e dende entón estiveron a traballar tanto na definición do clube como nas posibilidades de desenvolver este tipo de iniciativas. O Autoclásico Ribeira Sacra arrinca con arredor de 20 socios, que coidaban con esmero estes utilitarios de hai máis de trinta anos. «Uns poucos tiñamos coches deste tipo, e vendo que en sitios como Lalín había un clube que tiña gran aceptación, decidimos poñer en marcha o clube, xa que aquí no sur de Lugo non había ningunha asociación deste tipo», precisa José Antonio Castro, que cita os exemplos de Lugo e Valdeorras, cidades que contan cun clube de coches clásicos, ou o caso de Ourense, onde hai unha escudería, máis enfocada ao desenvolvemento de probas tipo rally.

RUTAS POLA RIBEIRA SACRA EN UTILITARIO

«Nós o que pretendemos con este clube é facer rutas turísticas pola Ribeira Sacra dun xeito singular, a través dos coches clásicos», explica o presidente do Club Autoclásico Ribeira Sacra. «Temos unha zona incríble, os Canóns do Sil e do Miño, a zona do Courel e do Incio, e o que tratamos é de dar a coñecer estas paisaxes a través destas rutas, incluso para a xente de aquí», precisa Castro, que apunta que o obxectivo principal é «pasalo ben con esta actividade».

CONCENTRACIÓN DE VEHÍCULOS E RUTA TURÍSTICA O 7 DE ABRIL

E para que isto se cumpla, xa teñen preparada a súa primeira actividade. O vindeiro 7 de abril, o clube organiza unha concentración de vehículos clásicos na explanada da Compañía de Monforte ás 9 horas, para saír ás 11,30 nun pequeno roteiro pola Ribeira Sacra, que culminará cunha comida no restaurante Don Manuel ás 15 horas. Os interesados en participar nesta singular iniciativa poden anotarse ata o 3 de abril na dirección de correo electrónico acribeirasacra@gmail.com.