Os debates tiveron lugar no Parlamento de Galicia, e resultou gañador o IES de Foz
Do 5 ao 6 de abril desenvolvéronse en Santiago de Compostela os debates da fase final do certame Parlamento Xove 2013. O equipo procedente do IES A Pinguela de Monforte, integrado por Pablo Casas Quiroga, Tania Fernández Rodríguez, Sara Moure López, Sandra Piñeiro Pedreira e o director do centro, Enrique Sampil, acadaron o segundo posto da clasificación final, por detrás do campión, o IES de Foz. Nesta edición do Parlamento Xove participaron un total de 48 centros públicos e privados de toda Galicia, o que supuxo a maior participación na historia deste certame. Os debates desenvolvéronse no Parlamento Galego, institución que aportou a súa sede para esta competición. O acto institucional estivo presidido pola Presidenta do Parlamento Galego, Pilar Rojo, a secretaria segunda da Cámara, Marisol Soneira, a Conselleira de Traballo e Benestar, o Director Xeral de Xuventude e a Secretaria Xeral de Igualdade, Susana López Abella. O instituto monfortino xa acadara o subcampionato na pasada edición, e este ano tamén conseguiu o terceiro posto na modalidade de ESO.
