• O conselleiro de Medio Ambiente, Territorio e Infraestruturas anunciou en Sober a aprobación definitiva do Plan por parte da Xunta • Sober é o primeiro concello da comarca con PXOM aprobado
O pasado 5 de abril, o conselleiro de Medio Ambiente, Territorio e Infraestruturas, Agustín Hernández, visitou Sober para anunciar a aprobación definitiva total do Plan Xeral de Ordenación Municipal (PXOM) deste municipio do sur de Lugo. Hernández suliñou a “culminación dun traballo que se leva desenvolvendo dende agosto do 2009”, cando tivo lugar a aprobación parcial do Plan Xeral. Durante a súa visita a Sober, o conselleiro estivo acompañado polo alcalde, Luis Fernández Guitián, que exerceu de anfitrión; a delegada territorial da Xunta en Lugo, a soberina Raquel Arias; e a secretaria xeral Ordenación do Territorio e Urbanismo, Encarnación Rivas.
PRINCIPAIS CARACTERÍSTICAS DO PLAN XERAL DE SOBER
O conselleiro de Medio Ambiente destacou como principal elemento deste documento, e según se tiña solicitado no momento da aprobación parcial, a eliminación do novo crecemento residencial de 120.000 metros cadrados proposto na parroquia de Arroxo. Asimemos, o Plan Xeral clasifica como solo rústico de protección forestal os bosques de ribeira, e limita a altura das edificacións. Según informaron dende a Consellería, este planeamento urbanístico, cunha vixencia de dez anos, prevé para este periodo 70 novas vivendas en catro solos urbanos non consolidados, e un total de 1.200 en núcleo rural. Asimesmo, o Plan recolle 125.000 metros cadrados para espazos libres e zonas verdes, e máis de 63.000 para equipamento comunitario, unha cifra superior ao esixido pola lei, concretamente un 55% máis. O responsable de Medio Ambiente indicou tamén que este documento aprobado definitivamente “axudará a limitar as novas construcións urbanísticas co fin de potenciar a rehabilitación do patrimonio existente”.
POTENCIACIÓN DA REHABILITACIÓN COMO “PRIORITARIA PARA RECUPERAR O PATRIMONIO, MELLORAR A CALIDADE DE VIDA E CREAR EMPREGO”
A Xunta de Galicia defende a rehabilitación como “unha actividade prioritaria para recuperar o patrimonio, mellorar a calidade de vida da poboación e crear empregos”. Neste senso, Sober conta coa súa Área de Rehabilitación Integral (ARI), que dispón de preto de 400.000 euros asignados e que xa recibiu 43 solicitudes concretas para realizar actuacións de rehabilitación. A área declarada comprende todo o concello, e poderá beneficiarse das axudas para ARI de carácter rural e de menos de 5.000 habitantes. O número de vivendas que poden acollerse á rehabilitación no ámbito desta área é de 2.328, preto do 90% dos inmobles deste municipio que ten unha poboación de 2.599 habitantes. A nova área de rehabilitación permitirá aos propietarios destas vivendas acceder a axudas, sempre e cando teñan unha antigüidade superior a dez anos, non superen os ingresos máximos estipulados e as destinen a domicilio habitual e permanente, polo menos durante cinco anos, tras a finalización das obras de rehabilitación.
A XUNTA OFRECERÁ ÓS CONCELLOS DE MENOS DE 5.000 HABITANTES A REDACCIÓN DUN PLAN BÁSICO DE ORDENACIÓN MUNICIPAL
A Consellería de Medio Ambiente está a impulsar a tramitación eficiente dos planeamentos urbanísticos dos concellos galegos dende a pasada lexislatura, cando se aprobaron dúas ordes, por un importe total de 13 millóns de euros, destinadas unicamente á tramitación dos planeamentos. No caso de Sober, a axuda para a redacción do PXOM ascendeu a 84.000 euros. Según concretaron dende Medio Ambiente, o Plan Xeral de Sober é o sexto que se aproba de xeito definitivo nesta lexislatura, o que deixa en 67 os concellos que contan cun planeamento adaptado á lei vixente. Sober é tamén o primeiro concello da comarca de Terra de Lemos que dispón dun planeamento aprobado, xa que os restantes municipios están a tramitar os respectivos documentos. O titular de Medio Ambiente sinalou na súa visita a Sober que, co fin de seguir na liña de apoio financeiro, técnico e de asesoramento en materia urbanística, ofreceráselles aos concellos de menos de 5.000 habitantes (que actualmente ascenden a un total de 199) a posibilidade de que a Xunta de Galicia asuma a redacción dun plan básico de ordenación municipal. Según Hernández, esta colaboración suplirá as carencias técnicas, humanas ou económicas que lle impidan ás pequenas administracións locais dotarse desta figura para ordenar e xestionar o seu territorio.
