Lolo rodou varias secuencias da súa nova curtametraxe “Sister’s dreams”
O director sarriao Roberto Lolo gravou na cafetería Lúa varias secuencias da súa nova curtametraxe, titulada “Sister´s dreams”, en colaboración co alumnado da Escola de Imaxe e Son (EIS) da Fundación TIC de Lugo. Un grupo de estudantes do ciclo de Realización da EIS formaron parte do equipo técnico, apoiando ós profesionais nos postos de cámara, son e iluminación.
A RELACIÓN DE DÚAS IRMÁNS A TRAVÉS DOS SOÑOS
A nova curta escrita, producida e dirixida por Roberto Lolo conta a historia de “dúas irmáns ás que une un sentimento de odio mutuo, que tan só poden materializar a través dos sonos”, segundo explica o cineasta lucense. “Sister´s dreams” ten como protagonistas ás actrices madrileñas María de Miguel e Ana Calabozo, coas que Lolo mantén unha estreita relación profesional. Esta é a segunda colaboración que a Fundación TIC mantén co cineasta Roberto Lolo, logo de participar na gravación e na estrea da curta “Triste Soledad de un Violinista”, na que a cantante Soraya Arnelas e o actor Alberto Amarilla desempeñaron os papeis principais. A estrea deste traballo tivo lugar no Pazo de San Marcos, coa asistencia dos protagonistas e ducias de persoas. Nestes días, a produtora lucense Coolfilms tamén rodou en Sarria esceas da mediametraxe “O Crime da Legua Dereita” de Luis Noriega e Jordi Santos, co apoio técnico do alumnado da EIS.
