Posible servizo de mediación intraxudicial en Lugo

O vicepresidente da Xunta, Alfonso Rueda, comprometeuse cos representantes da Asociación Galega de Pais e Nais Separados a estudar a posibilidade de estender o servizo de mediación intraxudicial familiar nos xulgados de Lugo. Este servizo funciona “con éxito” nos xulgados de Santiago e Ourense e recentemente ampliouse aos de Vigo. O obxectivo do servizo de mediación intraxudicial é impulsar a resolución dos conflitos familiares pola vía do diálogo e o consenso, unha fórmula que todos os profesionais consideran “idónea” nos casos de separacións e divorcios, especialmente cando hai por medio fillos e fillas menores. Ademais, este tipo de mediación -que se leva a cabo cando o proceso xudicial xa está iniciado- aforra tempo e cartos nos procesos, diminúe a carga de traballo e, especialmente, reduce os custes emocionais dos participantes.