Dende o Concello traballan na elaboración dos eventos do segundo semestre

O Espazo Expositivo da Praza de Abastos está a funcionar como dinamizador do centro urbano da vila do Cabe coa celebración dos Mercados de Monforte. Estas citas temáticas que se veñen desenvolvendo dende o segundo semestre do ano pasado contan cunha boa acollida tanto por parte do público como dos expositores participantes.

SINGULARIDADE DA OFERTA DOS MERCADOS DE MONFORTE

Así o manifestou a concelleira de Promoción Económica de Monforte, Mª Xosé Vega, quen destacou “moi positivamente” os mercados celebrados ata o momento “tanto polas vendas como polo propio espazo”, e polo feito de que “achegan ó consumidor unha variedade de oferta sobre un mesmo produto que ás veces é difícil de atopar”. Esta singularidade está a ser valorada polo público, que no caso do anterior Mercado adicado ós queixos respondeu moi favorablemente á proposta dos Mercados. Esta acollida fixo que dende o Concello puxeran en marcha na recente edición deste Mercado “unha iniciativa novidosa, que consiste en traer un país invitado ou unha Denominación de Orixe invitada, sempre co ánimo de sumar e non de restar”, explicou Mª Xosé Vega. Pola súa parte, o alcalde de Monforte, Severino Rodríguez, explicou que o Mercado de Produtos de Excelencia de Galicia e Norte de Portugal, organizado a mediados de abril polo Concello de O Barco a través do Eixo Atlántico, estivo enfocado “á promoción e posta en valor de pequenos produtores que traballan de maneira tradicional e cunha calidade excepcional”. O alcalde de Monforte comentou que foi a primeira vez que unha organización externa utiliza o espazo central da Praza de Abastos para organizar un mercado, algo que “nos indica que estamos no camiño correcto en canto ó esforzo por promover este espazo”. Severino Rodríguez avogou por realizar o maior número de acontecementos posible coa intención de que “sirvan para atraer a máis xente”.

PRÓXIMAS CITAS NOS MERCADOS DE MONFORTE

A concelleira de Promoción Económica adiantou que o calendario dos Mercados de Monforte está xa determinado ata xullo. Así, no mes de maio haberá dous mercados, o de Plantón de Horta e Flor, os días 11 e 12, e a segunda cita será co Mercado de Chacinaría, os días 18 e 19. Xa no mes de xuño , o Espazo Expositivo da Praza de Abastos de Monforte acollerá un mercado titulado “Mundo Ovo”, que terá lugar os días 8 e 9, e que estará centrado nos produtos relacionados con este alimento básico. O segundo Mercado de xuño estará adicado ó Pan, Empanadas e Doces, durante os días 22 e 23. En xullo desenvolverase o Mercado Agroecolóxico, os días 6 e 7, e o Mercado de Conservas Galegas, os días 13 e 14.