A empresa Hijos de Rivera firmou a compravenda de dúas parcelas para ampliar a súa fábrica, e amosou o seu compromiso de “continuidade e xeración de riqueza na zona de Chantada”

O 24% da superficie dispoñible no parque empresarial xa foi vendida nuns meses

O polígono de Chantada está a experimentar movementos de ampliación de empresas alí instaladas, no que supón unha aposta pola consolidación deste parque industrial como motor de xeración de riqueza. Así, o pasado 12 de abril, a corporación Hijos de Rivera, propietaria da filial Custom Drinks, antiga Sidrería Galega, instalada nos Acivros, firmou coa Deputación de Lugo o contrato de compravenda de dúas parcelas cun total de 17.000 metros cadrados, co fin de ampliar a planta da súa filial. Ademais, está previsto que Hijos de Rivera merque ó Concello de Chantada un total de 1.600 metros dunha parcela anexa.

NOVO PASO PARA A RECUPERACIÓN ECONÓMICA E LOITA CONTRA O DESPOBOAMENTO

Os novos terreos que incorpora Custom Drink están incluídos na zona de ampliación do polígono dos Acivros que foi urbanizada no seu día pola Deputación de Lugo. O titular do organismo provincial, José Ramón Gómez Besteiro, destacou durante a visita que realizou ás instalacións da planta chantadina previa á firma da compravenda, que a Deputación “está a favorecer a creación de emprego e a innovación empresarial na provincia”, e suliñou que este paso ten como consecuencia “a contribución á recuperación económica e á loita contra o grave despoboamento que padecemos”. Asimesmo, Besteiro valorou esta iniciativa emprendedora como “fundamentalsempre para a prosperidade dun país, pero moito máis nestes momentos tan difíciles, nos que acadamos taxas de paro insoportables para a sostibilidade económica, pero tamén en termos sociais”.

BESTEIRO: NECESIDADE DUN TECIDO EMPRESARIAL “COMPETITIVO”, E DUN COMPROMISO POLÍTICO QUE O IMPULSE

O presidente provincial lembrou que Lugo conta con 7.000 parados máis que hai tres anos, e alertou contra a “grave situación” na zona sur da provincia, onde o paro aumentou nun 60% dende 2010. Gómez Besteiro cualificou de “alarmante” o desemprego entre a mocidade, xa que “a metada da poboación xuvenil está no paro, e moitos vense obrigados a marchar do país, co que estamos a perder un capital humano determinante”. Diante desta situación, o mandatario provincial destacou como unha “urxencia” a necesidade de creación de emprego, o que esixe “un tecido empresarial competitivo, con gañas e capacidade de innovación, pero sobre todo un compromiso político que o impulse e o apoie”. O proxecto de ampliación do polígono dos Acivros acometido pola Deputación de Lugo respondía á forte demanda de solo empresarial na zona nun momento onde a capacidade do parque industrial estaba ó completo. Dende finais dos anos 90 estaba prevista esta actuación, aínda que a dotación orzamentaria realizouse coa chegada do actual equipo de Goberno, así como a súa execución. Un total de 118.000 novos metros cadrados de solo industrial nos Acivros foron urbanizados polo ente provincial a través do SUPLUSA (Sociedade Urbanística Provincial), cun investimento de preto de 3 millóns de euros. Actualmente, esta ampliación conta con 48 parcelas, cun total de 88.000 metros cadrados. Asimesmo, e como medida de estímulo para a instalación de empresas, a Deputación Provincial rebaixou o prezo do solo a 33 euros o metro cadrado de media, un 67% máis barato que nos polígonos xestionados pola Xunta.

HIJOS DE RIVERA APOSTA POLA SOLIDEZ DA EMPRESA EN CHANTADA

Durante a visita ás instalacións de Custom Drinks en Chantada, o conselleiro da corporación Hijos de Rivera e administrador único de Custom Drinks, José María Rivera Trallero, amosouse satisfeito coa adquisición destes 17.000 metros cadrados no polígono dos Acivros, “o que proporciona á nosa filial a solidez necesaria para afrontar o futuro con confianza e valorar novos proxectos na zona”. Rivera Trallero aproveitou a ocasión para expresar “o compromiso da empresa coa continuidade e a xeración de riqueza no entorno de Chantada”. Custom Drinks é unha compañía pertencente á Corporación Hijos de Rivera, e que conta cunha ampla variedade de produtos “premium” no seu catálogo, sendo ademais capaz de ofrecer ós seus clientes o concepto “Made to Order”, adaptándose para poder fabricar calquera bebida en calquera formato. Na actualidade, a planta instalada en Chantada é a única compañía sidreira en Galicia e unha das poucas en España que aposta pola agricultura ecolóxica na elaboración dos seus produtos. Este aspecto compleméntase co seu labor de laboratorio I+D+i e plataforma de innovación, que foi capaz de adaptar as últimas tendencias en formatos e produtos a procesos produtivos e tecnolóxicos.

MANUEL VARELA ESIXIU Ó GOBERNO CENTRAL A EXECUCIÓN DA A-56, “IMPRESCINDIBLE PARA O DESENVOLVEMENTO DO SUR DE LUGO”

Asimesmo, o alcalde de Chantada, Manuel Lorenzo Varela, amosou a súa satisfacción porque “unha empresa, nestes momentos tan complicados, non só manteña os postos de traballo, senón que os incremente”. O rexedor local aproveitou a visita ás instalacións desta empresa nos Acivros para esixir ó Goberno central a execución a autovía A-56 entre Lugo e Ourense, “xa que é unha infraestrutura imprescindible para impulsar o desenvolvemento socioeconómico de Chantada e, tamén, de todo o sur de Lugo”.