Vidal Bolaño, o gran creador da escea galega

A obra do dramaturgo compostelán Roberto Vidal Bolaño, protagonista deste ano

Roberto Vidal Bolaño, homenaxeado o Día das Letras Galegas 2013, adicou toda a súa vida ó teatro nas súas diferentes facetas: dramaturgo, director, adaptador, deseñador de iluminación, escenógrafo e incluso como actor nunha decena de espectáculos. CEC.

Teatro en sentido puro é o eixo sobre o que xira este ano o programa de celebracións do Día das Letras Galegas. O dramaturgo Roberto Vidal Bolaño, finado no 2002, deixou unha pegada definitiva na configuración do teatro profesional galego, e por iso a Real Academia Galega escolleuno como protagonista da gran festa das nosas letras, e ós escenarios como emprazamento principal do programa de actividades.

BOLAÑO OCUPA TODA A PRODUCIÓN DO CENTRO DRAMÁTICO GALEGO DESTE ANO

Así, a Consellería de Cultura, Educación e Ordenación Universitaria desenvolve ó longo de todo o ano unha intensa programación onde o protagonista é o teatro, sen olvidar a reedición da obra de Vidal Bolaño, as actividades divulgativas e os soportes audiovisuais para facer chegar a todos os públicos o legado deste insigne dramaturgo compostelán. O seu espazo natural, o teatro, será a localización de máis de 100 representacións, espalladas pola principais vilas e cidades de Galicia. O Centro Dramático Galego (CDG) adicará, por vez primeira, toda a súa actividade anual a un único autor; “Días de gloria” será a gran produción do CDG deste ano, baixo a dirección de Fefa Noia. Complementa esta actividade coa participación na produción de “Criaturas” e “BailadELAS. Seis mulleres bolañesas” coas dúas compañías teatrais fundadas polo propio Bolaño, Teatro do Aquí e Teatro Antroido, respectivamente. Seguindo a pegada innovadora que Vidal Bolaño defendeu en toda a súa creación, o CDG pon en marcha durante este ano o Premio Roberto Vidal Bolaño ao Espectador, que ten como obxectivo estimular a participación activa do público que sigue a programación do Salón Teatro de Santiago, xestionado polo Centro Dramático Galego. Un xurado integrado polos traballadores do CDG valorará o interese e a brillantez das suxestións ou comentarios que os espectadores vaian rexistrando tralas representacións neste escenario, e o gañador recibirá un abono anual para asistir de balde a todas as funcións do Salón Teatro, así como as obras completas de Vidal Bolaño. Para que a obra do homenaxeado chegue a todos os públicos, está prevista para outubro a estrea de “Touporroutou da lúa e do sol”, coproducida polo CDG, Teatro do Noroeste e a Escola Superior de Arte Dramática de Galicia. O ámbito universitario terá espazo tamén para Bolaño, da man de tres traballos escénicos: “Animaliños”, a cargo da Aula de Teatro da USC; “A burla do galo”, pola Aula de Teatro UDC-Teatro Normal; e “RVB 2013”, a cargo da Aula de Teatro Universitario de Ourense-Compañía de Teatro Cordelia.

BOLAÑO NOUTROS SOPORTES

A programación cultural da Consellería de Cultura en torno ó homenaxeado no Día das Letras Galegas inclúe ademais o ciclo “Vidal Bolaño recuperado: citas audiovisuais”, que mostra ó público gravacións históricas das representacións do autor compostelán, e a proxección do filme “Doentes”, de Gustavo Balza, sobre o texto homónimo de Bolaño. A escolma libresca dos escritos do dramaturgo compostelán ten tamén un espazo neste ano de celebracións. A Editorial Galaxia publica unha edición especial de “Un chapeu negro e un nariz vermello”, mentres que Edicións Positivas editará as obras completas de Bolaño e o texto dramático “Doentes”. Asimesmo, a colección Cadernos Ramón Piñeiro adicará un número especial á traxectoria creativa de Vidal Bolaño. Como complemento, unha exposición itinerante desenvolvida pola Asociación Roberto Vidal Bolaño coa colaboración da Xunta percorrerá Galicia entre maio e decembro para ofrecer unha panorámica da obra do dramaturgo a través das imaxes dos seus espectáculos, personaxes e textos.

EXPOSICIÓN SOBRE OS 150 DA PUBLICACIÓN DE “CANTARES GALLEGOS”

En torno á lingua galega e ás súas manifestacións literarias, este ano conmemórase o 150º aniversario da publicación de “Cantares Gallegos” de Rosalía de Castro. Con este motivo, está aberta ata xuño na Biblioteca de Galicia unha exposición que recolle a historia editorial desta obra clave da nosa literatura, a través de exemplares singulares e de gran valor, ademais de traducións, estudos críticos, antoloxías, partituras, audiovisuais e material curioso de carácter efémero. Esta exposición contou coa colaboración da Fundación Rosalía de Castro, Real Academia Galega, Consello da Cultura Galega e Fundación Cidade da Cultura.

Roberto Vidal Bolaño na escola

As celebracións do ano adicado a Vidal Bolaño ofrecen un amplo abano de actividades vinculados á difusión da obra deste autor entre os escolares. Un concurso-exposición de carteis nas modalidades de primaria e secundaria protagonizan o aspecto máis visual, que tamén dá cabida ás novas tecnoloxías, a través dunha aplicación específica no espazo Abalar para saber máis sobre a obra de Roberto Vidal Bolaño.

Un dos carteis premiados no Concurso-Exposición das Letras Galegas, na modalidade de Educación Primaria (creación do CEIP Alfonso Daniel Rodríguez Castelao de Rianxo). CEC

Pola súa banda, os Equipos de Dinamización da lingua galega elaboraron toda unha serie de propostas en torno a este autor, e os docentes dispoñen dunha unidade didáctica sobre a obra “Días de gloria”, unha das crecacións máis emblemáticas do dramaturgo compostelán. Bolaño será o protagonista da Festa da Lingua que convoca a Federación de Relixiosos do Ensino de Galicia, e tamén centrará os diversos actos que, con motivo do Día das Letras Galegas, se desenvolverán en 38 universidades de fóra de Galicia a través dos departamentos de Lingua e Literatura Galega. Pola súa banda, a Biblioteca Nodal de Lugo organiza un obradoiro de creación para nenos e nenas de 6 a 14 anos, e o tradicional Certame de Narración e Debuxo Infantil Letras Galegas.

Carteis premiados no Concurso-Exposición das Letras Galegas, na modalidade de Educación Secundaria (creación da Asociación Roberto Vidal Bolaño). EC.

Deixa unha resposta

Your email address will not be published.

Nova Anterior

Presentadas as VII Xornadas Xurídicas de Sarria

Seguinte Nova

Comerciantes e empresarios de Sarria achéganse ó comercio electrónico nunha xornada informativa

Últimas noticias sobre CULTURA

A %d blogueros les gusta esto: