Cinco taekwondistas do Gimnasio Neka participarán o 8 de xuño no Campionato Galego de Combate en Idade Escolar
Os taekwondistas do Gimnasio Neka volveron a estar presentes no Campionato de España, onde o xoven Iago García acadou un bo quinto posto, consolidando así a súa presencia entre os primeiros deportistas a nivel nacional desta especialidade. «Iago realizou un bo campionato, pasou a primeira ronda pero en segunda caeu diante do representante da federación catalana», explica o seu adestrador, José Mª Vega. O responsable do Gimnasio Neka manifestaba a súa satisfacción porque Iago García consolidara o posto que xa acadou o ano pasado no campionato nacional; «Iago cumpriu os obxectivos, aínda que como levamos unha racha moi boa de medalleiro a verdade é que nos supo a pouco», precisa Vega.
5 TAEKWONDISTAS NO CAMPIONATO GALEGO DE COMBATE EN ARTEIXO
A próxima cita dos taekwondistas monfortinos coa competición será o 8 de xuño, na localidade coruñesa de Arteixo, onde se disputará o Campionato Galego de Combate en Idade Escolar. O Gimnasio Neka contará cunha ampla representación, a cargo de Manuel Veloso, José Roca, Mario Fernández, Alex Camba e Saúl Martínez. «O noso obxectivo é colarnos no medalleiro», explica José Mª Vega.
XORNADA DE TECNIFICACIÓN A NIVEL PROVINCIAL CON JUAN FERNÁNDEZ, CAMPIÓN DE ESPAÑA
Dende o Gimnasio Neka seguen a traballar para consolidarse como un referente indiscutible do taekwondo na provincia de Lugo. Dentro da súa intensa programación anual, o 2 de xuño celebraron a partir das once e media nas instalacións deste centro deportivo unha concentración de tecnificación de combate, na que participaron arredor de 40 deportistas procedentes de varios puntos da provincia de Lugo. «Contamos coa presencia de luxo de Juan Fernández, campión de España, nesta sesión de entreno técnico que penso foi todo un éxito», explica Vega.
