•Rodríguez Barreira anunciou o compromiso de Fomento de manter o tren nocturno Galicia-Madrid •O PP de Monforte puxo en marcha unha nova web e un perfil nas redes sociais “para estar máis preto dos cidadáns”
A deputada autonómica e concelleira na cidade do Cabe Julia Rodríguez Barreira foi elixida presidenta do Partido Popular de Monforte no congreso local celebrado o 25 de maio, tomando o relevo de Dámaso López, que declinou presentarse á reelección tras unha longa traxectoria á fronte desta formación local. A lista liderada por Julia Rodríguez está integrada, entre outros, por Francisco José Rodríguez Cela, José Manuel Puga Gómez, Purificación Argiz Quintas, María Pérez Naveira e Ana María Díaz Novoa.
NOVAS CANLES DE COMUNICACIÓN
Os responsables da agrupación local do PP anunciaron a posta en marcha dunha nova web, www.ppdemonforte.com, e do perfil PP de Monforte nas redes sociais Facebook e Twitter, co obxectivo de “estar máis preto dos cidadáns”. Asimesmo, a recén elixida presidenta do PP monfortino mantivo un encontro coa Ministra de Fomento, Ana Pastor, quen lle transmitiu o compromiso de manter o tren nocturno Galicia-Madrid. Barreira transmitiu a Pastor a súa “preocupación e interés” porque o taller de Renfe siga a prestar os seus servizos en Monforte.
