Unha celebración singular que acada o recoñecemento institucional

Este recoñecemento converte a Quiroga no primeiro Concello de Galicia en reunir tres distincións desta categoría

O calendario de celebracións do sur lucense é rico en citas lúdicas que ofrecen a veciños e visitantes unha ocasión excelente para coñecer as tradicións de cada localidade, os seus lugares emblemáticos, a súa historia e os seus produtos. Buscar a excelencia dentro deste gran mapa festivo supón un chanzo adiante para a promoción e a posta en valor dun evento. De aí que a consideración de Festa de Interese Turístico de Galicia sexa un preciado recoñecemento, que nestes días acaba de recibir a Mostra do Aceite de Quiroga.

«INDUBIDABLE» ATRACTIVO TURÍSTICO PARA UNHA CELEBRACIÓN ÚNICA NO NOROESTE PENINSULAR

Así, o Consello da Xunta de Galicia do pasado 23 de maio decidiu conceder a distinción de Festa de Interese Turístico á Mostra do Aceite de Quiroga, que se ven celebrando de xeito ininterrumpido dende o ano 2001. A Xunta recoñecía así esta manifestación popular «de gran valor cultural», que ten como base unha das máis arraigadas tradicións da comarca de Quiroga. A singularidade desta celebración outórgalle un «indubidable atractivo turístico» que esta distinción pretende recoñecer, xa que este concello é o único punto do noroeste peninsular cunha prolongación ata Salamanca onde a oliveira é un cultivo autóctono.

MOENDA TRADICIONAL DO ACEITE DURANTE A XORNADA FESTIVA

Dende a Xunta de Galicia destacaron o feito de que a Mostra do Aceite de Quiroga, que se celebra o último domingo de febreiro ou o primeiro de marzo, ofrece ós visitantes a posibilidade de asistir en directo ó proceso íntegro de elaboración artesanal deste preciado aceite, en dúas moendas que se realizan ó longo da xornada festiva, empregando o instrumental e os procedementos que marca a tradición. Proba do fondo saber desta técnica artesanal é o refraneiro popular de Quiroga, que recolle en non poucas referencias as particularidades desta actividade e o seu arraigo nas xentes da comarca.

ENTORNO DE ALTO VALOR PAISAXÍSTICO E MONUMENTAL

Ademais, a Mostra do Aceite ofrece un espacio de venda de produtos tradicionais da comarca, e o ambiente lúdico increméntase coa participación de grupos de folclore local. O valor etnográfico de todos os elementos que reúne a Mostra do Aceite de Quiroga enriquécense coas particularidades do entorno no que se desenvolve, dotado dun «alto valor paisaxístico e monumental».

«ESPALDARAZO» Ó SECTOR DO ACEITE E Ó MANTEMENTO DA TRADICIÓN

Que a Mostra do Aceite de Quiroga sexa recoñecida como Festa de Interese Turístico de Galicia foi recibido como unha «moi boa noticia» no Concello. O alcalde de Quiroga, Julio Álvarez, precisou que esta distinción implica que «polo menos podemos manter esta tradición», e para o sector produtivo do aceite supón «todo un espaldarazo» ós esforzos que os produtores están a facer para dar a coñecer a calidade e a singularidade do aceite da comarca de Quiroga. «As axudas que ofrece a Xunta anualmente para a celebración deste tipo de festas así consideradas apoia o mantemento desta tradición», precisa o rexedor local, que amosa tamén a súa satisfacción «porque esta distinción reafirma a acción política que nos levou a apostar hai once anos por esta festa tan singular».

QUIROGA, ÚNICO CONCELLO EN GALICIA CON TRES DISTINCIÓNS TURÍSTICAS

O traballo de promoción das tradicións e dos valores das terras de Quiroga que se ven realizando dende o Goberno local suma con este recoñemento un logro máis, que sitúa ó Concello de Quiroga nunha posición excepcional no conxunto da nosa comunidade autónoma. Aínda que xa son 83 as Festas de Interese Turístico de Galicia declaradas pola Xunta, Quiroga é o único municipio de Galicia que conta con tres recoñecementos dos seus valores turísticos e naturais. Ademais da recentísima mención á Mostra do Aceite, xa en 2005 Quiroga recibiu a distinción de Concello de Interese Turístico, e o ano pasado o Sinclinal da Serra do Caurel foi considerado oficialmente Monumento Natural. «Estas consideracións baséanse nos recursos endóxenos desta terra, nos seus valores naturais e paisaxísticos, e o seu atractivo turístico está funcionando», explica o alcalde de Quiroga, que segue a traballar na consecución de novos proxectos para a promoción e a posta en valor do municipio. «Hai tres solicitudes de Ben de Interese Cultural (BIC) en marcha, e esta mesma semana xa se enviaron dous para valorar en Patrimonio», explica Julio Álvarez, «e sen dúbida contribuirán a potenciar aínda máis a nosa oferta de turismo de interior».