•Nesta quincena quedará rematada a segunda fase das tarefas de limpeza de vexetación •Estes traballos enmárcanse dentro da estratexia de mantemento de estradas e seguridade vial que desenvolve o ente provincial ó longo do ano
A mediados de xullo comezou a segunda fase do Plan de roza das estradas de titularidade provincial, co obxectivo de desenvolver este servizo nun total de 21 municipios. Sarria, Portomarín, Paradela, Láncara, O Páramo, Monforte de Lemos e A Pobra do Brollón están incluídos nesta segunda fase dos traballos para a limpeza de vexetación nas marxes das estradas.
CONTRATACIÓN DE AUTÓNOMOS E PYMES PARA LOITAR CONTRA A CRISE
Estas actuacións están a ser realizadas polo dispositivo posto en marcha a comezos de xullo polo departamento de Vías e Obras da Deputación de Lugo, que incorpora un total de 70 operarios equipados con 50 máquinas. O desenvolvemento do Plan de roza de 2013 supuxo a contratación, por parte do ente provincial, destas tarefas a 23 autónomos e pequenas empresas da provincia, co que a institución lucense busca impulsar a economía e o mantemento dos postos de traballo na nosa provincia nesta época de crise. Dende a Deputación lembraron que o Plan de roza conta cun investimento de 600.000 euros con cargo ós fondos provinciais destinados á conservación do 4.300 quilómetros de estradas da rede provincial.
ACONDICIONAMENTO DO FIRME NA REDE PROVINCIAL
As tarefas de mantemento e conservación desenvólvense ó longo de todo o ano. Na época estival, ademais dos traballos de limpeza da vexetación das marxes das estradas e cunetas, dende Vías e Obras están a realizar arranxos no firme, naqueles puntos da rede provincial onde este aparece deteriorado ou ofrece características que poidan poñer en perigo a seguridade na circulación dos vehículos. Como todos os anos, o verán concentra as labores de rebacheo e acondicionamento con zahorra e rego asfáltico, que este ano xa se realizaron nunha ducia de concellos organizados por zonas según as necesidades.
AFORRO DE CUSTES GRACIAS A ACTUACIÓNS ANTERIORES DE MANTEMENTO
O Plan de Rebacheo da Deputación de Lugo conta cun importante orzamento, que este ano acada os 5 millóns de euros. Os responsables provinciais suliñaron que outras actuacións anteriores, como o acondicionamento de 1.000 quilómetros de viais con aglomerado en quente realizado o ano pasado, supuxeron un aforro nos custes do mantemento para esta anualidade, xa que o material aplicado mantén o bo estado do firme das estradas por máis tempo, evitando arranxos posteriores.
