Quiroga adica especial atención á promoción dos seus produtos tradicionais, que no caso da mel celebra o seu día grande o 10 de agosto. A Mostra do Mel de Quiroga acada este ano a súa vixésimo segunda edición, amosando a calidade deste produto natural, que comparte un lugar destacado no panorama gastronómico da comarca quiroguesa xunto ó aceite, o viño ou as castañas.
UN PROGRAMA FIEL Á TRADICIÓN DOS 22 ANOS DE MOSTRA
Fieis á tradición, dende o Concello de Quiroga veñen de deseñar un programa festivo para o sábado 10 de agosto que mantén a liña que lle garantiu o éxito durante estes vintedous anos de Mostra. Así, tralo acto inaugural ás once da mañá, procederase á apertura dos stands de exposición e venda, onde veciños e visitantes poderán adquirir mel producida en Quiroga, así como outros produtos de calidade da zona, como o aceite ou os doces, entre outros. Os postos permanecerán abertos ata despois do xantar.
OUTROS TRABALLOS TRADICIONAIS
Dado que a Mostra do Mel celebra unha produción alimentaria típica de Quiroga, dende o Concello queren aproveitar este evento para dar a coñecer outros procesos tradicionais de produción, como os tecidos ou a talla de madeira. Así, no Museo Etnográfico de Quiroga desenvolverase un fiadeiro tradicional, no que se poderá ver en directo o traballo con lá de ovella, e como novidade, incorpórase este ano unha demostración do traballo da madeira a cargo dos artesáns de Campos da Vila, da carpintería Armaoir.
Cargando ...
