Graves discrepancias entre Deputación e Xunta de Galicia en este aspecto

O proceso para a posta en marcha dos Grupos de Emerxencias Supramunicipais (GES) na provincia de Lugo está a protagonizar a actualidade política, polas discrepancias entre a Deputación de Lugo e a Xunta de Galicia, os dous organismos que, xunto coa Fegamp (Federación Galega de Municipios e Provincias) deberán soster a financiación deste servizo a través do convenio de colaboración que teñen asinado.

“GRAVES RREGULARIDADES” NO PROCESO DE SELECCIÓN DE PERSOAL

A polémica comezou cando, logo de establecer a tres bandas as bases de contratación deste persoal, alcaldes e colectivos lucenses denunciaron ante a Deputación o incumprimento deste acordo en Guitiriz, Folgoso do Courel e Quiroga, o que motivou que o ente provincial esixise á Xunta a celebración dunha Comisión de Seguimento para esclarecer estos aspectos. Según explicou o deputado provincial e membro da Fegamp José Luis Raposo, as denuncias recibidas indicaban que o Concello de Guitiriz modificou as bases do proceso de selección de persoal, alterando os requisitos dos aspirantes e as puntuacións; así, baixaron a idade límite para aspirar ás prazas ós 16 anos, cando o convenio esixe ter cumpridos os 18. En canto ás puntuacións, e según os datos aportados dende o ente provincial, as irregularidades detectadas consistían en valorar cun máximo de 4,5 puntos o traballo desenvolto como persoal do GRUMIR ou en emerxencias municipais, cando no convenio o máximo eran 3 puntos, ou cun máximo de 0,5 puntos por cada ano na Agrupación de Voluntarios de Protección Civil, cando o convenio establecía 0,5 puntos por cada mes neste servizo. En canto a Quiroga e Folgoso, as denuncias referíanse a que estes Concellos non celebraron un concurso oposición, senón un concurso de méritos, e no caso de Folgoso do Courel denunciouse que a Alcaldesa contratou á súa propia irmá, e a un primo carnal do seu marido e a outras persoas afíns ó Partido Popular que estiveron xa traballando noutras ocasións para o Concello. Asimesmo, os tres concellos mencionados non cumpriron, según as denuncias presentadas, os prazos fixados pola Xunta de Galicia para a selección de persoal. Por estes motivos, trala celebración da Comisión de Seguimento a mediados de xullo, José Luis Raposo denunciou que a Xunta de Galicia “permitira e avalara” o que interpretou como “anomalías” no proceso selectivo, e que non esixira a súa rectificación senón que tratara “desesperadamente de xustificar a estes Concellos”. En consecuencia, o deputado provincial comunicou que “mentres estes tres municipios non rectifiquen e non axusten as súas actuacións literalmente ó texto do convenio asinado por Xunta, Fegamp e Deputación de Lugo”, o ente lucense non aportará as achegas correspondentes, “porque non están cumprindo coa legalidade, pero tamén para non discriminar ós Concellos que si cumpren e actúan conforme ó acordo”.

POSTURA DO CONCELLO DE QUIROGA ANTE ESTA POLÉMICA

A raíz destas declaracións, o alcalde de Quiroga, Julio Álvarez, emitiu un comunicado de prensa onde se amosou “sorprendidísimo ó enterarme polos medios de comunicación de que o Concello que presido convocara un concurso para cubrir as prazas dos GES de Quiroga”, e desmentiu tal feito. Álvarez afirmou que “os socialistas provinciais teñen un mal informador en Quiroga”, e criticou a “sempiterna incontinencia verbal” do portavoz socialista na Deputación lucense. No seu comunicado, Julio Álvarez lembrou que o Concello de Quiroga dispón “dende hai moitos anos” dos GRUMIR, postos en marcha en Galicia precisamente na súa etapa como presidente da Fegamp, “e que a día de hoxe seguen a funcionar en Quiroga”. En canto ó persoal deste servizo, Álvarez precisou que está contratado a través do Programa de Cooperación da Xunta de Galicia, “como en todos os concellos”, e parte deste persoal se mantén con fondos propios, uns meses como voluntarios e outros como contratados, “dependendo da situación económica do Concello”. Asimesmo, o rexedor quirogués precisou que o Concello de Quiroga “non firmou ningún convenio coa Deputación e a Xunta para o famoso GES”, senón que o que fixo “foi adherirse a un convenio da Fegamp”, ó que se aterán a todos os efectos “cando nos expliquen qué é o que hai que facer cos GRUMIR saíntes”, e garantiu que “as contratacións se realizarán igual que sempre se fixeron neste Concello, coa lei na man”.

MÁIS DENUNCIAS

Por outra banda, José Luis Raposo denunciou ademais que a acta da primeira Comisión non recollera “literalmente” o acordo para suspender a selección de persoal no Courel e a paralización dos procesos de Guitiriz e Quiroga. Raposo criticou ademais outra eiva da Comisión de Seguimento “que tamén tumbou a Xunta”, e que se refire ó incumprimento da regra básica de paridade entre institucións na composición desta Comisión, “perxudicando á Deputación”, e apuntou a que esta desigualdade podería invalidar todo o acordado por este órgano. Raposo lembrou ademais que a Comisión non ten potestade para tomar decisións, “senón para interpretar o convenio ou velar polo seu cumprimento”.

RESPOSTA DA XUNTA DE GALICIA

En relación a esta polémica, a delegada territorial da Xunta en Lugo, Raquel Arias, afirmou que “é rotundamente falso que a Xunta e a Deputación de Lugo acordaran paralizar o proceso de selección de persoal dos GES”. Arias explicou que o proceso selectivo é responsabilidade dos Concellos, “e por suposto dende a Xunta non imos tolerar ningunha irregularidade”, e salientou que na Comisión de Seguimento “por abrumadora maioría dos seus membros se estimou que o procedemento que seguen os Concellos de Quiroga e Guitiriz é correcto”. No caso de Folgoso, Arias explicou que “non se está seleccionando persoal para o GES, senón para dispoñer dun equipo de emerxencias do propio Concello”, que funcionará en tanto non se poña en marcha o GES. •