Fomento das actividades turísticas e enolóxicas co apoio provincial

A Deputación aprobou unha achega de 158.000 euros ó Concello destinada a dinamizar as actividades turísticas no sur de Lugo ó longo de todo o ano

Atraer visitantes a Monforte e á súa área de influencia ó longo de todo o ano é o obxectivo da política de promoción económica que se está a desenvolver dende o Concello de Monforte, tomando como base o potencial enoturístico e as posibilidades da gastronomía e do calendario festivo das diversas épocas do ano.

CONVENIO DE COLABORACIÓN ENTRE O CONCELLO DE MONFORTE E A DEPUTACIÓN DE LUGO

Para dar pulo a este traballo, dende a Área de Cultura e Turismo da Deputación, dependente da Vicepresidencia, veñen de aprobar unha achega de 158.000 euros destinada a colaborar co Concello de Monforte no desenvolvemento do programa “Promoción da actividade turística e enolóxica”.

“PAPEL FUNDAMENTAL” DO CENTRO DO VIÑO

Según explicaron os responsables provinciais, esta iniciativa busca dinamizar o tecido socioeconómico mediante a promoción dunha ampla oferta de ocio que se extende ó longo do ano, e na que xoga “un papel fundamental” o Centro do Viño da Ribeira Sacra, que permite ós visitantes un achegamento completo á cultura e ó mundo do viño, a través das súas instalacións museísticas, da tenda de viños e da oficina de turismo.

ARRANXO DAS ESTRUTURAS DO MERCADO DE SEGUNDA MAN, E REDACCIÓN DO PROXECTO DE REFORMA DO CAMPO DA FEIRA

Esta colaboración entre a área de Cultura provincial e o Concello de Monforte permitirá dar a coñecer os Mercados de Monforte, de carácter temático e que están a revitalizar tanto o espazo da Praza de Abastos como o centro urbano e comercial, ó tempo que serven de escaparate para a nosa gastronomía. A achega provincial fará posible tamén outro tipo de actuacións, como a reparación das casetas de madeira do Parque dos Condes, onde se celebra o Mercado de Segunda Man, a construción dunha pérgola que protexa aos participantes das inclemencias do tempo, e, noutro orden de cousas, a redacción do proxecto de reforma do Campo da Feira, para poder dispor dun novo espazo de celebración de eventos que estimulen o interese económico e turístico de toda a Ribeira Sacra e non só de Monforte.

“ESTRATEXIA CONXUNTA” PARA TODOS OS CONCELLOS DO SUR DE LUGO

O delegado provincial de Cultura e Turismo, Mario Outeiro, afirmou que “estas actuacións permitirán ofrecer unha oferta turística e enolóxica enmarcada nunha estratexia conxunta para todos os concellos do sur lucense”.

PULO Ó PATRIMONIO ETNOGRÁFICO A TRAVÉS DAS FESTAS MÁIS PROPIAS, E Á DINAMIZACIÓN DO PASEO FLUVIAL E DO RÍO NA CIDADE

Os responsables provinciais destacaron asimesmo que este convenio de colaboración, aprobado o 19 de xullo, inclúe asimesmo a promoción da Festa do Antroido e a Festa do Río, dúas citas xa consolidadas no tempo. A integración do Entroido neste programa promocional xustifícase, según os responsables provinciais, na súa función de reclamo para promover o patrimonio inmaterial do sur da provincia de Lugo, mentres que a Festa do Río, que se celebra desde 2005, intenta recuperar o protagonismo do río Cabe na vila, rexenerando o seu entorno e poñendo en valor o espazo urbano xunto ó río.