Sacan a concurso a concesión dos clubes náuticos de Doade, Belesar Presa e Portomarín

Dende a Área de Turismo da Vicepresidencia da Deputación explican esta decisión “para reforzar a oferta turística da provincia dando solución a un problema real creado despois de que os anteriores adxudicatarios renunciasen á concesión administrativa”. Os responsables provinciais precisaron ademais que as adxudicacións se realizarán de xeito individual para cada área recreativa, e destacaron como novidade que o prego de condicións valorará nun 60% da puntuación o feito de que as empresas candidatas desenvolvan un programa de actividades turísticas complementarias. “Trátase de redefinir o papel dos clubs náuticos, para que traballen tamén como auténticos puntos de información turística e escaparates de todo o que pode ofrecer a Ribeira Sacra, como o viño, a gastronomía ou a artesanía da zona”, precisaron.