Actividades para todos dende o 11 ó 16 de agosto

Do 11 ó 16 de agosto, Monforte de Lemos celebrará as Festas Patronais cun programa de actos que ofrece actividades e lecer para todos os públicos.

XOGOS DE RÍO PARA ABRIR AS FESTAS

A partir das tres da tarde, e ata as oito, o río Cabe será o esceario do primeiro evento das Patronais. O entorno fluvial acollerá os Xogos de Río, unha iniciativa organizada pola Deputación de Lugo que inclúe xogos acuáticos como paddle surf, sea scooter, bolas acuáticas, canoas e patinetes acuáticos. A continuación, ás oito e media da tarde, terá lugar a lectura do pregón dende a Casa do Concello de Monforte de Lemos, este ano a cargo do monfortino Ramón Casanova. Xa ás nove da noite, procederase ó lanzamento do foguete que anuncia o comezo oficial das Festas Patronais, dende o Campo de San Antonio, e a continuación prenderase a iluminación festiva.

ROCK’N LEMOS FESTIVAL NA NOITE DO DÍA 11

A noite será o espazo para a música, nesta ocasión a ritmo de rock. A partir das dez, comezará no Parque dos Condes o Rock’n Lemos Festival, coa actuación dos grupos monfortinos The Poet’s Silence e Perpetual Twilight, ademais de Bastards on Parade e Arizona Baby. A música sigue ás 11, na Praza de España, co concerto da Banda de Saxos de Redondela.

FESTIVAL CÓMICO POLAS RÚAS, FESTA BAILE PARA OS MAIORES, PANDEREITEIRAS E FESTA-VERBENA CON ORQUESTRAS

O luns 12 de agosto comezará coas alboradas a cargo do Grupo de Gaitas Municipal, dende o mediodía, e á unha xuntaranse cos Cabezudos no centro da cidade. Tamén dende as doce do mediodía desenvolverase o I Festival Cómico-Festivo “A rúa é vosa”, no que o a compañía de teatro ambulante Os cómicos dell auto, inspirados na Commedia dell’arte, achegarán unha serie de pezas deste rexistro, adaptadas ás situacións modernas, dende o seu impresionante vehículo, con dous espectáculo de mañá e tarde. A música tradicional terá o seu espazo dende as oito e media, co percorrido que realizarán polo centro da cidade, saíndo dos Chaos, o grupo de pandereiteiras da Asociación Cultural Amigos da Pandeireta de Monforte. A noite seguirá sendo musical, coa celebración, a partir das nove, dunha festa-baile adicada ós nosos maiores na Praza de España, amenizada polo dúo musical Bandoneón. A Compañía acollerá, dende as dez, a festa-verbena a cargo das orquestras-espectáculo Gran Atlanta e Trébol.

PASARRÚAS, HAPPENING CÓMICO NAS RÚAS, PALLASOS E VERBENA GALEGA

A mañá do martes día 13 comezará coas alboradas e pasarrúas dende as doce por todo o centro urbano. O teatro cómico ambulante comezará tamén ás doce, dentro do I Festival Cómico-Festivo “A rúa é vosa”. O espectáculo do día será un happening, no que unha clown muda misteriosa ofrecerá con humor e sutileza un retrato crítico de certos clichés construídos socialmente ó redor do universo feminino. Haberá un intervalo musical entre as dúas representacións teatrais a cargo da Charanga Unión Monfortina, e á unha da tarde, Musicoloco ofrecerá un espectáculo teatral na Praza de España. Xa pola tarde, o teatro de rúa volve en plena forma, cun espectáculo a cargo dunha pallasa e centrado no deporte e as situacións fóra do cotiá. Tralos pasarrúas da Charanga Unión Monfortina, ás nove da noite Musicoloco fará outro pase do seu espectáculo. Ás dez da noite comezará a verbena galega na Compañía, con cinco horas de música tradicional, pachanga galega con orquestras de baile e picadiscos. Pechará a xornada a Banda de Música de Monforte, ás once, na Praza de España.

MAXIA, ESPECTÁCULO CIRCENSE E VERBENA

Alboradas e pasarrúas iniciarán o mércores 14, e ás 12 o Mago Migueliño, dentro do I Festival Cómico-Festivo, desenvolverá os seus divertidos trucos na Praza de España. O Cardeal acollerá á unha da tarde o espectáculo de circo e música de Ringo Rango, tamén dentro do Festival de teatro. A tarde acollerá outra actuación de ambos artistas; o Mago Migueliño realizará un novo espectáculo ás oito no Cardeal, e Ringo Rango sorprenderá con novos números ás nove na Praza de España. Entre ambos, actuarán polo centro urbano o grupo de Pandereiteiras da Asociación Amigos da Pandeireta de Monforte. A verbena do mércores na Compañía comezará ás dez da noite, a cargo das orquestras-espectáculo Compostela e Principal. A Banda de Música de Antas de Ulla dará un concerto na Praza de España dende as once.

DÍA DO GAITEIRO, BARCAS ENGALANADAS E FOGOS ARTIFICIAIS O XOVES 15

Vinteunha bombas de palenque anunciarán, o xoves 15 de agosto ás nove da mañá, o inicio do día grande das Festas Patronais. Ás dez, a comitiva de autoridades sairá cara San Vicente dende o Campo de San Antonio para realizar a ofrenda floral á Virxe de Monserrat, patroa da cidade, na igrexa de San Vicente do Pino. Ás doce, a Banda de Gaitas Municipal ofrecerá un concerto na rúa Cardeal. O xoves acollerá tamén o Día do Gaiteiro, que comezará ás once coa saída, dende a Praza de España, de oito grupos de gaiteiros procedentes de toda Galicia, que intepretarán alboradas polo centro urbano ata a unha da tarde. Neste mesmo punto concentraranse grupos de música tradicional, que interpretarán as súas composicións ata as tres. Xa pola tarde, tralos pasarrúas, ás oito e media celebrarase na Praza de España a Mostra de Danza e Música Tradicional, coa participación de catro grupos locais. Ás dez, comezará na Compañía a festa-verbena coas orquestras Los Players e Delirio. Ás once, comezará o percorrido das Barcas Engalanadas dende o Malecón, e ás doce iniciarase o espectáculo de fogos artificiais dende o monte de San Vicente.

CABEZUDOS, MAXIA E HUMOR NO TEATRO DE RÚA, E VERBENA NA PRAZA DE ESPAÑA

O último día das festas sacará á rúa os Cabezudos con pasarrúas ás doce da mañá, voltará o I Festival Cómico-Festivo con maxia ás 12 na Praza de España, e con humor á unha da tarde no Cardeal, con outro pase ás oito e nove da tarde, respectivamente. A Praza de España acollerá a última festa-verbena, coa actuación, a partir das dez da noite, da orquestra Los Trovadores e o grupo Canela.•