Quiroga celebra a XXII Mostra do Mel

•A fin de semana da Mostra inclúe boa parte da programación das Festas do Verán, con música, deporte, actividades infantís e a Festa da Xuventude, entre outros actos

O mel de Quiroga, resultado das laboriosas abellas, poderá ser adquirido nos stands da XXII Mostra, situados na rúa Real da capital quiroguesa. Este ano, a feira incorpora unha demostración do traballo da madeira. EC.

A exaltación dos produtos da terra constitúe unha ocasión única para a celebración popular. En Quiroga, aproveitan a Mostra do Mel para concentrar as actividades das Festas do Verán, cun programa de actos que aglutina gastronomía, música, arte e tradicións, sen esquecer ó público infantil e xuvenil.

NOVE APICULTORES, FIADEIRO DE LÁ E DEMOSTRACIÓN DO TRABALLO DA MADEIRA, NA XXII MOSTRA DO MEL

O sábado 10 de agosto é o día adicado ó mel de Quiroga. Durante toda a xornada e dende as once da mañá, veciños e visitantes poderán mercar o mel producido nas terras quiroguesas, xunto a outros produtos típicos da zona. Nesta edición da Mostra do Mel estarán presentes coa súa produción os apicultores José Río Espada, de Pacios de Mondelo; Isabel Marcos López, de A Ponte Rodela; Manuel Macía González, de As Estradas; Ángel Gómez Martínez, de Paradapiñol; Andrés Campo García, de Fisteus; Manuel Rodríguez Fernández, de Centeais; Agripino Ferreira Machado, Blanca Carballo Rodríguez e Manuel Macía Castiñeira, de Quiroga. Como novidade, dende as once e media ata a unha e media da tarde, ademais do fiadeiro tradicional de lá, o recinto da feira do mel acollerá unha demostración do traballo da madeira.

ARTE, MÚSICA E DEPORTE PARA ABRIR A FIN DE SEMANA

Dende o día 8 e ata o domingo 11, Quiroga celebra as Festas do Verán, cun programa variado que pensa en todos os públicos. A cita futbolística é un elemento indispensable nas festas dos nosos pobos, e en Quiroga este ano céntrase nos máis novos, coa disputa, entre o xoves e o venres, do Torneo Infantil de Fútbol das Festas do Verán, ás seis da tarde no campo de fútbol municipal. Pola súa banda, o aspecto artístico ven de gañar forza no calendario festivo, e no programa das Festas do Verán de Quiroga estará centrado no talento local, coa inauguración, o venres ás oito da tarde, da exposición de pintura dos alumnos e alumnas que completaron o curso de pintura organizado pola Asociación Sociocultural da Comarca de Quiroga. O mesmo venres a partir das nove e media da noite comezará a VIII Festa da Comunidade, amenizada polo dúo Fondo Tropical no parque da Constitución. A música seguirá na zona dos pubs, onde a partir da medianoite terá lugar a Festa da Xuventude, na que participarán os grupos +IVA e Los Árboles.

MOSTRA DO MEL, CONCURSO ARTÍSTICO E FESTA POPULAR CON LUCÍA PÉREZ PARA A XORNADA DO SÁBADO

A XXII Mostra do Mel de Quiroga centra o programa de eventos da capital comarcal durante o sábado 10 de agosto. Logo da apertura de stands ás once da mañá, e tras comezar o fiadeiro de lá e a demostración de traballo en madeira, amenizarán o ambiente os pasarrúas a cargo da Banda de Música de Antas de Ulla, que ofrecerá un concerto diante do Concello á unha da tarde. Xa pola tarde, e dende ás sete menos cuarto, a Praza de España acollerá o V Concurso Pinta con Xiz no Chan, actividade que dará paso a unha noite musical. A partir das nove e media comezará a festa popular amenizada pola orquestra Pontevedra e o Grupo Limón, coa actuación da intérprete eurovisiva Lucía Pérez.

MAXIA, FÚTBOL E MÚSICA PARA REMATAR AS FESTAS DO VERÁN

A mañá do domingo iniciarase cos pasarrúas a cargo da banda de gaitas Brabán e a charanga Terras do Bibei, e pola tarde haberá sesión deportiva que terá como protagonista ó fútbol, coa presentación da plantilla do Quiroga F.C. no Trofeo Xoiería Zafiro. Os máis cativos terán o seu momento festivo na tarde do domingo. A Praza de España acollerá dende as oito o espectáculo de malabares, humor e novo circo Peterpunk, organizado en colaboración coa Rede de Dinamización Lingüística. A música voltará á noite, coa festa popular que dende as nove e media estará amenizada pola orquestra Fania Blanco Show e o grupo Océano. Estes mesmos intérpretes serán os encargados de poñer o punto final ás Festas do Verán de Quiroga na Gran Verbena que se desenvolverá a partir das doce da noite.•

Deixa unha resposta

Your email address will not be published.

Nova Anterior

I CERTAMEN DE PINTURA ÁNGELA LÓPEZ CASTRO

Seguinte Nova

Arte, música tradicional e degustación na XVIII Feira da Rosca de Sober

Últimas noticias sobre CULTURA

Maika Makovski

Unha das actuacións estelares do 17º Ribeira Sacra Festival Onte arrincou unha nova edición do 17º

A %d blogueros les gusta esto: