Os comerciantes apostan por Monforte na nova edición da Feira de Mostras

A 2ª Feira de Mostras que organiza o CCU de Monforte terá lugar do 15 ó 18 de agosto

•Os responsables do CCU esperan repetir a excelente acollida da pasada edición, cando se venderon 12.000 entradas “a pesar da crise” •Este ano, o acceso ó recinto feiral situado nos Escolapios será gratuíto •A Feira contará coa participación de máis de 80 expositores

A pasada edición da Feira de Mostras, organizada no entorno dos Escolapios polo CCU de Monforte, acadou un éxito de público, rexistrando máis de 12.000 visitantes.(Foto cedida).

Monforte presume de comercio, e convencidos da calidade e da variedade da súa oferta, os responsables do Centro Comercial Urbano de Monforte poñen en marcha a segunda edición da Feira de Mostras Val de Lemos. Do 15 ó 18 de agosto, o entorno do Escolapios acollerá a máis de 80 expositores, que amosarán o mellor dos seus produtos e servicios a unha cidade en plena efervescencia festiva.

PRESENCIA DE TODOS OS SECTORES COS MÁIS DE 80 EXPOSITORES DA FEIRA DE MOSTRAS

Alimentación, fogar, industria, estética, automoción, seguros, artesanía, decoración e unha longa lista máis de sectores estarán presentes nos días de remate da semana grande das Patronais de Monforte. O tirón de público das festas, unida á ampla oferta comercial prometen unha exitosa Feira de Mostras, co atractivo de que este ano a entrada é gratuíta. “Estamos moi satisfeitos cos resultados do ano pasado”, explica Mª José Senra, presidenta do CCU de Monforte, “porque todos os expositores, agás un só, tiveron ventas, e porque foi moita a aceptación da xente, xa que vendimos 12.000 entradas a pesar da crise”. De aí que a directiva do CCU de Monforte aposte en firme por esta Feira de Mostras, “ó ser gratuíta, estamos matándonos a organizala o mellor posible”, e esperan “como mínimo repetir os resultados do ano pasado, que estaría moi ben, coa que está caendo”.

Artesanía, decoración, fogar alimentación ou automoción son, entre outros, os sectores que estarán representados na vindeira Feira de Mostras Val de Lemos, organizada polo Centro Comercial Urbano de Monforte no días finais na semana grande de agosto. O obxectivo desta iniciativa é amosar a capacidade de Monforte como centro de compras e ocio en todo tipo de sectores de actividade. (Foto cedida).

HORARIO DE MAÑÁ E TARDE, ACTIVIDADES PARA NENOS, MÚSICA E UNHA CHARLA PROFESIONAL

Para facilitar que o público disfrute o máximo posible dunha sesión de compras, e poida coñecer a variedade de produtos que se poden acadar en Monforte, a organización estableceu un horario de mañá e tarde, con actividades complementarias. Así, a Feira de Mostras Val de Lemos poderá visitarse de once da mañá a dúas da tarde, e de seis da tarde a once da noite. Está previsto que os máis pequenos poidan contar con inchables, minigolf e karts, ademais de poder participar en obradoiros de artesanía todos os días da Feira. A música estará presente coa actuación das Pandereiteiras de Monforte, a Banda de Gaitas Municipal e o Grupo de Danzas do Concello de Monforte. Asimesmo, haberá espazo para a formación, cunha charla o venres, en horario por confirmar, sobre dereitos e obrigas dos autónomos ante os riscos laborais. Ilusión, traballo e aposta firme polo potencial do comercio monfortino son as claves desta iniciativa, que foi recuperada o pasado ano pola actual directiva do CCU, e que conta co apoio do Concello de Monforte. “Hai que transmitir á xente que Monforte ten todas as posibilidades comerciais dunha gran cidade, coas vantaxes das cidades pequenas”.•

Deixa unha resposta

Your email address will not be published.

Nova Anterior

No verán, estradas máis despexadas

Seguinte Nova

Todo listo en Chantada para celebrar as Festas Patronais

Últimas noticias sobre ASOCIACIONISMO

 
A %d blogueros les gusta esto: