Polémica en torno ó catamarán

O Partido Popular critica a situación «insostible» das rutas do catamarán da nosa provincia

•Dende a Área de Turismo provincial acusan ós populares de «actuar de mala fe e falar do que non saben»•Defenden o éxito das campañas promocionais realizadas, apoiándose no incremento, en máis de 3.000 visitantes, no número de usuarios dos catamaráns respecto a 2012

A voceira do Grupo Provincial do Partido Popular, Elena Candia, durante a rolda de prensa celebrada diante das instalacións do Club Náutico de Doade, acompañada entre outros polo alcalde de Sober, Luis Fernández Guitián; o alcalde de Bóveda, José Manuel Arias; a parlamentaria autonómica e voceira do PP en Monforte, Julia Rodríguez; e o alcalde de Pantón, José Luis Álvarez. Arquivo EC.

O turismo fluvial acaparou a actualidade política coa polémica xurdida a nivel provincial pola situación das rutas dos catamaráns lucenses. A finais do mes de xullo, a voceira do Grupo Popular na Deputación de Lugo, Elena Candia, convocaba ós medios de comunicación diante das instalacións pechadas do Club Náutico de Doade para anunciar a posición do seu grupo ante as «deficiencias existentes na xestión das rutas do catamarán polos ríos Miño e Sil».

RECOLLIDA DE SINATURAS E POSIBLE RECLAMACIÓN PATRIMONIAL

A voceira popular na corporación provincial, que estivo acompañada, entre outros, polo alcalde de Sober, Luis Fernández Guitián, o rexedor de Bóveda, José Manuel Arias, e o alcalde de Pantón, José Luis Álvarez, adiantou a moción que, días despois, presentaría o seu grupo no Pleno provincial para instar á Deputación a «subsanar de maneira inmediata estas deficiencias», para «dar resposta ás demandas trasladadas polo sector e cumprindo o compromiso asumido en sesión plenaria de outubro de 2012». Asimesmo, Elena Candia anunciou unha campaña de recollida de sinaturas «co obxecto de instar ó Goberno provincial a que comece a traballar», e apuntou que o Grupo Popular valorará unha posible reclamación patrimonial por danos e perxuícios «dada a repercusión negativa que esta situación está a xerar nos establecementos e no sector turísticos».

ESIXEN UN PROGRAMA DE TRABALLO DESEÑADO ENTRE ADMINISTRACIÓN E SECTOR PRIVADO

Según adiantara Elena Candia, os populares esixiron na súa moción presentada no Pleno provincial celebrado o día 30 «que se enmenden as deficiencias existentes na xestión dos catamaráns. Ademais , esixiron ao equipo de goberno da Deputación «a que se estableza unha comisión de traballo», na que estean presentes todas as administracións e entidades representativas da actividade privada, e na que se deseñe un programa que inclúa aspectos como a planificación de paradas, a posta en funcionamento de infraestruturas, a mellora na atención aos usuarios e na sinalización e a adecuación do entorno, entre outros puntos, «co que dea resposta a todos os implicados, sendo aceptado dito resultado como vinculante».

O servizo de catamaráns da Ribeira Sacra lucense centrou a polémica política no sur de Lugo. Arquivo EC.

DEFICIENCIAS DETECTADAS NESTE SERVIZO

Asimesmo, a voceira do Grupo Provincial do Partido Popular referiuse á existencia de escritos trasladados a Área de Cultura e Turismo tanto por parte do sector como de asociacións, establecementos hostaleiros e o propio Grupo Popular nos que demandan unha mellora no servizo e refiren a deficiencias como «a supresión de rutas, a redución de paradas en áreas recreativas como a Illa de Maiorga, ó peche de clubes náuticos en temporadas altas de turismo, e a mala atención ao usuario». Candia cualificou de «insostible» a situación a día de hoxe, e afirmou que a repercusión sobre o turismo «é moi evidente froito das importantes deficiencias existentes que o propio bipartito provincial recoñeceu ao votar a favor da moción dos populares en outubro de 2012».

RESPOSTA DO GOBERNO PROVINCIAL

Fronte a estas críticas, o delegado de Turismo da Deputación de Lugo e voceiro do BNG na corporación provincial, Mario Outeiro, destacou o incremento «espectacular» do número de viaxeiros nos catamaráns que xestiona a institución provincial, e acusou ó Grupo do Partido Popular de “actuar de mala fe e de falar do que non sabe” cando afirma que as campañas turísticas na Ribeira Sacra non están a ser un éxito. Outeiro informou de que o catamarán de Doade rexistrou no que vai de ano un total de 9.052 viaxeiros, fronte aos 7.476 do ano pasado, mentres que o de Belesar ascende xa a 1.555 fronte aos 761 do exercicio anterior, e no dos Robles a estas alturas rexístranse 754 viaxeiros, superando aos 120 de 2012. «Este é un dato fundamental para valorar o éxito ou fracaso das campañas turísticas que se desenvolven”, puntualizou o responsable provincial de Turismo, quen insistiu en que os datos desmontan as valoracións «infundadas» dos populares. “As opinións do PP teñen pouco valor, e aínda menos as que se refiren a que os clubs náuticos se atopan fechados, cando o único que está nesa situación é o de Doade, e os outros se atopan en proceso de licitación”.•

Deixa unha resposta

Your email address will not be published.

Nova Anterior

Pulo ó comercio e á eficiencia enerxética no concello de Sarria

Seguinte Nova

Miña casiña, meu lar

Últimas noticias sobre ECONOMÍA

     
A %d blogueros les gusta esto: