As piscinas acolleron a Festa de despedida, con xantar incluído

Quiroga despediu cun acto festivo ós participantes nos Campamentos de Verán. O pasado 30 de agosto, as piscinas municipais acolleron a Festa da Escuma, na que un bo grupo de rapaces e rapazas de entre 3 e 12 anos disfrutaron desta actividade, e a continuación foron convidados a un xantar de despedida na cafetería destas instalacións de lecer.

CAMPAMENTO TAMÉN PARA OS NENOS VERANEANTES

Os Campamentos de Verán de Quiroga desenvolvéronse dende o 1 de xullo ata o 30 de agosto, con máis de 100 participantes, contabilizando todos aqueles nenos e nenas que estiveron de xeito permanente os dous meses, e aqueles que se anotaron por periodos máis breves, incluíndo ós rapaces que elixiron Quiroga como lugar para as vacacións estivais. As actividades desenvolvéronse nas piscinas municipais, polideportivo e casa da cultura de Quiroga, según as características da programación.

REPASO DE VERÁN, NOVIDADE DESTE ANO

Xogos, deportes, manualidades, obradoiros diversos, natación e todo tipo de actividades lúdicas integraron a oferta dos Campamentos de Verán de Quiroga, que este ano tiveron como novidade o Repaso de Verán, unha hora diaria de repaso dos contidos académicos adaptados a cada nivel. Todo un éxito que dende o Concello de Quiroga pensan repetir o vindeiro ano.