•O Concello elaborou unha enquisa ó alumnado, nais e pais do colexio, para saber qué actividades extraescolares lles interesarían
Nenos e nenas de Bóveda contarán este ano con actividades extraescolares “á carta”, logo da enquisa que ven de realizar a delegación municipal de Cultura para coñecer cales son as actividades que máis interesarían ó alumnado e ós seus pais e nais.
CALENDARIO INFANTIL
En canto ás actividades infantís, que se desenvolverán de outubro a maio, xa está programado parte do calendario para o curso 2013-2014. Así, a actividade de música serán os martes para nenos e nenas menores de 6 anos, e os mércores para maiores de 6 anos, ambos grupos en horario de 17,00 a 18,30 horas. Cada sesión terá un descanso no medio, para poder impartir solfeo, instrumento, canto e xogos coa música. Pola súa banda, o programa de conciliación familiar ou ludoteca funcionará os martes para nenos e nenas maiores de 6 anos, e os mércores para menores de 6 anos, ambos grupos en horario de 17,00 a 18,30 horas e cun máximo de 15 alumnos por grupo. Na ludoteca, os rapaces realizarán xogos, manualidades e actividades lúdicas e divertidas sobre o calendario festivo (samaín, nadal, entroido, letras galegas ou primaveira), ademais de facer os deberes. Por outro lado, as clases de danza galega serán os venres de 17 a 18 horas, e as de deporte os xoves no mesmo horario.
XÓVENES, ADULTOS E MAIORES
Tamén de outubro a maio desenvolveranse as actividades para o público non infantil, con clases de música e instrumento tradicional galego os xoves de 18 a 19 horas, e banda de gaitas os sábados de 16 a 18 horas. O obradoiro de memoria de Bóveda será na biblioteca os martes de 11,30 a 12,30 horas, e o da oficina do Campo da Feira será á mesma hora os venres. Ademais, está aberto o prazo de inscripción do curso de informática e internet para traballadores en activo, que organiza o Concello de Bóveda e Xóvenes Agricultores. O curso será do 15 ó 31 de outubro, de luns a venres de 20,15 a 22,45 horas na Casa da Cultura.
