O grupo nacionalista no Concello de Chantada presentou unha moción para que o Alcalde explique o proceso de contratación dos monitores para as actividades de ocio e tempo libre desenvolvidas entre o 15 de xullo e o14 de agosto. Os nacionalistas lembraron que, con data de 19 de xullo, presentaron un escrito á Alcaldía con esta cuestión, e critican que o Goberno local asinara esta resolución con data de 11 de xullo, «a pesares das advertencias da Secretaría Xeral e da Intervención Municipal».
PIDEN RESPOSTA ÁS «ADVERTENCIAS» PROPOSTAS POLA SECRETARÍA XERAL
No seu escrito, o Grupo nacionalista de Chantada fai alusión ó posicionamento da Secretaría Xeral en canto a este trámite, no que se precisa que » é necesaria a declaración de necesidade excepcional que motive a contratación imprescindible para a presentazón do servizo, mediante a tramitación do oportuno expediente que se describe no informe». Asimesmo, os nacionalistas citan no seu escrito o informe da Secretaría do Concello respecto ó expediente de contratación, onde se indica que «a contratación, que se realizará unicamente en casos excepcionais e para cubrir necesidades urxentes e inaprazables, se restrinxirán aos sectores, funcións e categorías profesionais que se consideren prioritarios ou que afecten ao funcionamento dos servizos públicos esenciais e requirirá a previa e expresa autorización do Ministerio de Facenda e Administracións Públicas».
PREGUNTAN «COMO E POR QUE» SE REALIZOU ESTA CONTRATACIÓN
Os nacionalistas entenden que «no expediente non figura ningunha destas condición que se teñen que dar para levar a cabo este proceso», e esixen ó Alcalde que aclare no Pleno «como e por que se fixeron as cousas como se fixeron en relación coas advertencias da Secretaría xeral». O grupo nacionalista en Chantada tamén esixe información para saber «de que xeito se obrou para cumprir co principio de publicidade, igualdade, mérito e capacidade que debe cumprir todo proceso de selección para calquera oferta pública de emprego».
