Os socialistas pedirán nos 15 concellos do Camiño de Inverno que se oficialice a ruta canto antes

O PSdeG presentará mocións nos 15 concellos polos que discorre o Camiño de Inverno para instar á Xunta a que axilice os trámites para o recoñecemento oficial deste itinerario como ruta xacobea. Os socialistas emprenden esta iniciativa buscando o apoio das corporacións locais porque “Feijóo incumpriu o mandato do Parlamento de Galicia, que por unanimidade dos catro grupos da Cámara lle requiriu o pasado febreiro que nun prazo de seis meses, é dicir, en agosto, oficializase o Camiño de Inverno e iniciase os traballos de sinalización”, explicou o deputado Vicente Docasar, quen lamentou que aínda non haxa novedades neste aspecto. Os concellos deste Camiño de Inverno son O Barco, Vilamartín, Petín e A Rúa, en Valdeorras; Quiroga, Ribas de Sil, A Pobra do Brollón, Bóveda, Monforte de Lemos, Pantón, Sober, O Saviñao e Chantada, na Ribeira Sacra lucense; e Rodeiro e Lalín, no Deza.