A campaña Merca e gaña en Monforte, un estímulo para un shopping máis atractivo na nosa cidade

Iniciativas de dinamización local dende o comercio asociado

Un momento da presentación da campaña Merca e gaña en Monforte, coa presencia da delegada territorial da Xunta en Lugo, Raquel Arias; a presidenta do CCU Monforte, Mª José Senra; e o presidente da Federación de Comercio de Lugo, José Mª Seijas. (Foto cedida).

Entre o 18 e o 29 de outubro, o comercio asociado de Monforte buscou atraer á súa clientela e agasallar a súa fidelidade con 500 euros en bonos de compra a través da campaña Merca e gaña en Monforte, unha iniciativa desenvolvida polo CCU Monforte en colaboración coa Xunta de Galicia e a Federación de Comercio de Lugo.

OS BONOS PODERÁN CANXEARSE ATA O 1 DE DECEMBRO NOS MESMOS COMERCIOS ONDE SE REALIZOU A COMPRA PREMIADA

Durante os doce días da campaña, os clientes que realizaran compras nos establecementos asociados ó CCU Monforte recibiron boletos que, logo de incluir neles o seu nome e teléfono de contacto, introduciron nas urnas dispostas para tal efecto nos comercios e locais. Todos os boletos recollidos participarán nun sorteo o 31 de outubro ás 20,000 horas na rúa Cardeal. Sortearanse 10 bonos de compra por valor de 50 euros cada un, que deberán canxearse ata o 1 de decembro por compras a realizar nos mesmos locais ou comercios onde tivo lugar a compra premiada. A campaña Merca e gaña en Monforte ofreceu ós clientes máis de 120.000 bonos para participar neste sorteo.

A clientela responde á campaña Merca e gaña en Monforte, depositando os boletos para o sorteo logo de mercar na librería Agrasar. EC

73.000 EUROS EN AXUDAS DA XUNTA DE GALICIA ÓS CENTROS COMERCIAIS DE MONFORTE E CHANTADA

Durante a presentación da campaña Merca e gaña en Monforte, o pasado 17 de outubro, a delegada territorial da Xunta en Lugo, Raquel Arias, lembrou que a Consellería de Economía e Industria ven de outorgar diversas axudas ó Centro Comercial Urbano de Monforte e á Asociación de Empresarios, Profesionais e Autónomos de Chantada por un importe conxunto de preto de 73.000 euros, coa finalidade de dinamizar a actividade dos seus centros comerciais abertos. Igualmente, concedeu unha subvención de 109.000 euros á Federación de Asociacións de Comercio da Confederación de Empresarios de Lugo e outra de 112.000 euros á Federación Galega de Comercio, con sede en Lugo, para o desenvolvemento de iniciativas que reactiven o consumo no comercio local.

“CONSTANTE” TRABALLO DOS COMERCIANTES ASOCIADOS A PROL DA CALIDADE NO SERVIZO E NA ATENCIÓN ÓS CLIENTES

Asimesmo, Raquel Arias gabou o labor que desenvolven estas asociacións locais de comerciantes, así como o traballo da Federación Galega de Comercio, “constantemente preocupados por subir o listón, por mellorar a calidade, atención e o servizo que prestan aos consumidores”. Arias destacou que a campaña Merca e gaña en Monforte “é unha mostra do tipo de proxectos nos que se traduce o apoio da Xunta, xa que sen dúbida cumpre co obxectivo de facer máis atractivas as compras nos establecementos da cidade”. A delegada territorial en Lugo asegurou que a Xunta traballa en coordinación cos propios comerciantes porque “son os que mellor coñecen o sector, así que os escoita nas mesas locais de comercio e adapta as liñas de axudas ás súas necesidades”. “O comercio local é o que máis preto está dos cidadáns, colabora no pulso da vila e na súa sustentabilidade, vive integrado na cidade e polo tanto lle afecta o que nela ocorra”, destacou Raquel Arias para xustificar “o esforzo da Xunta” en continuar coas liñas de apoio a este sector.•

Deixa unha resposta

Your email address will not be published.

Nova Anterior

Comezou a campaña de vacinación contra a gripe

Seguinte Nova

A voceira do PP en Monforte asinou o seu apoio á candidatura da Ribeira Sacra a Patrimonio da Humanidade

Últimas noticias sobre ASOCIACIONISMO

 
A %d blogueros les gusta esto: