O mes de outubro arrincou en Sober coa nova edición da exitosa actividade municipal Merendas con Contos, que reúne na tarde dos venres a partir das 17,30 horas ós máis cativos en torno a unha divertida programación cultural, onde teñen cabida a música, a lectura e as artes plásticas e visuais.
OBRADOIRO MUSICAL
O pasado 25 de outubro, o dúo Claro que Sí desenvolveu un sorprendente obradoiro musical no que os máis novos amosáronse moi activos e satisfeitos. Ademais, ese mesmo día, e para celebrar a proximidade do Día das Bibliotecas, as instalacións da Biblioteca Municipal de Sober amosaron unha interesante exposición sobre os libros musicais que integran o fondo bibliográfico deste centro. Adaptacións de libretos de ópera para nenos, libro-discos, cómics ou unha aproximación á historia da Banda Municipal de Sober foron algúns dos materiais que puideron verse nesta mostra.•
