•O proxecto RICRA-Ribeira Sacra, impulsado conxuntamente por Pantón, Sober e O Saviñao, abre o acceso a máis persoas e optimiza custes
Pantón acolle dende esta semana e ata o mes de abril un obradoiro de emprego impulsado conxuntamente por este concello e os de Sober e O Saviñao. A delegada territorial da Xunta en Lugo, Raquel Arias, achegouse a Ferreira para coñecer o proxecto RICRA-Ribeira Sacra, financiado pola Consellería de Traballo e Benestar con preto de 178.000 euros, e no que 20 traballadores desempregados adquiren formación teórica e experiencia laboral en xardinería e montaxe e instalación de construcións de madeira., ademais de realizar obras de interese social nos tres concellos.
MELLORAS EN ESPAZOS PÚBLICOS DE O SAVIÑAO, PANTÓN E SOBER
Os espazos onde o alumnado desenvolverá os traballos de mellora no municipio de O Saviñao serán o campo da festa de Aiaz, a fonte de Estrumil, o antigo mercado do gando de Escairón, o campo da festa de Segán, e a capela de San Gregorio de Xixiriz, no concello do Saviñao. Con respecto a Pantón, os participantes no obradoiro traballarán na mellora da área recreativa de Castro de Ferreira, da de Gallegos, da de Monte Baliño, na praza de Goián e na zona da Fervenza de Augacaída. Pola súa banda, os espazos que se mellorarán en Sober con este proxecto son o entorno do miradoiro de Bolmente, do miradoiro e santuario de Cadeiras, do souto da Tallada, o da capela da Virxe dos Ánxeles e dos muíños do regato de Xábrega. Asimesmo, nos tres concellos acometerase a realización e instalación de mobiliario urbán. Raquel Arias defendeu este novo modelo de obradoiros de emprego, que en determinados casos promove ós concellos a mancomunar as propostas, xa que isto “significa coordinar accións e reducir custos, permitindo o acceso á actividade do maior número posible de persoas desempregadas”.•
