•Hai seleccionadas tres propostas finalistas no concurso de ideas •A convocatoria recibiu 39 proxectos procedentes de toda España
O xurado do concurso de ideas que o Concello de Sober convocou en base a un convenio co Colexio de Arquitectos de Galicia para a remodelación da Praza do Concello e a súa contorna escolleu tres propostas finalistas. Os proxectos seleccionados foron “Sombra”, de Marister Faílde Ferreiro e Belinda Besada Vergara; “Espacio soberino”, de Jorge García Anta, Fernando Aeiroá Lorenzo e Francisco Javier Barral Fernández; e “As catro estacións”, de Juan Ramón Sánchez Pernas. O xurado acordou conceder un accésit a “Combínalo como quieras”, de Luciano González Domínguez. Según explicaron dende o Concello, no primeiro proxecto valorouse a inserción do concepto de viñedo na proposta; no segundo, o feito de propoñer un novo edificio; e no terceiro, a orde xeométrica lóxica que plantea. O gañador terá que desenvolver o proxecto definitivo unha vez o Concello consiga os fondos precisos.
LUIS FERNÁNDEZ GUITIÁN: “O OBXECTIVO É TER UN PLAN DE FUTURO PARA A PRAZA DO CONCELLO”
O alcalde de Sober, Luis Fernández Guitián, explicou que o que se pretende é ter un plan de futuro para a Praza do Concello, “un verdadeiro plan director que perdure no tempo, tendo en conta que a capital municipal é das poucas vilas capital de Concello que non ten unha estrada de paso”. Inicialmente, o Concello non destina contía algunha a esta actuación, senón que se irá facendo o investimento en función dos recursos que se consigan da Xunta de Galicia ou doutras administracións.
TRABALLAR POR FASES SEGÚN O ORZAMENTO ACADADO
Guitián destacou ademais que se trata “dun concurso pioneiro nun concello pequeno como o de Sober”, polo que aposta por ter unha idea clara do proxecto a levar a cabo antes de comezar a pedir as axudas. Unha vez se vaia acadando o orzamento, o alcalde precisou que a previsión é a de executar as obras en diversas fases.•
