O pasado 13 de novembro, o conselleiro de Economía e Industria, Francisco Conde, avogou no Parlamento por promover o diálogo entre as partes implicadas na procura dun acordo estable para Cementos Cosmos que lle permita manter as expectativas de incremento de actividade económica e creación de emprego. Neste sentido, Conde subliñou que os acordos que se acaden deben garantir a produción ao completo, tanto na canteira de Triacastela como na planta de Oural. O titular autonómico destacou que o Goberno galego está a traballar para manter operativas ambas instalacións. Conde explicou que a Xunta está a mediar para avaliar a situación actual e as posibles solucións, que pasan por acadar un acordo que depende da empresa, que ten que facer compatible o cumprimento da licenza de actividade na canteira de Vilavella coa viabilidade económica da fábrica; e do concello, que debe velar polo interese público. “A Xunta estará aí en todo momento”, suliñou Conde, “velando polo desenvolvemento económico de Galicia, mediando para achegar posturas e defendendo a legalidade e os intereses xerais dos galegos, dos cidadáns de Sarria e Triacastela e, por suposto, dos traballadores de Cementos Cosmos”.
O conselleiro lembrou que a mediación da Xunta no seu día deixou abertas as posibilidades de recuperación da actividade e do emprego. Desde o primeiro momento, destacou Francisco Conde, o Goberno galego velou pola continuidade de Cementos Cosmos en Galicia, contribuíndo a acadar un acordo que “todas as partes viron positivo” e que permitiu manter 21 postos de traballo en Oural, recolocar outras 21 persoas na planta de Toral e conservar o emprego e a actividade económica xerada por 34 transportistas.
“A XUNTA MANTERÁ O SEU NIVEL DE COMPROMISO”
“Agora confiamos en que coa mesma receita do diálogo siga quedando aberta unha porta cara un futuro mellor”, sinalou Conde, quen garantiu que a Xunta manterá o mesmo nivel de compromiso que ten amosado ata o momento. •
Cargando ...
