Todo preparado para o inverno nas estradas provinciais

O Plan Invernal da rede viaria provincial xa traballa a pleno rendemento

O deputado de Xestión Territorial na Deputación de Lugo, Manuel Martínez, presentou o Plan Invernal da rede de estradas provinciais, que xa está en marcha. GPDL.

Como cada ano por estas datas, a Deputación de Lugo xa ten en marcha o Plan Invernal na rede de estradas de titularidade provincial. Os máis de 4.200 quilómetros que integran esta rede, a máis extensa de España na súa categoría, están a ser atendidos por un dispositivo composto por 104 operarios e 64 máquinas, e que están a traballar xa a pleno rendemento.

OBXECTIVOS DO PLAN INVERNAL DA REDE DE ESTRADAS PROVINCIAL

O Plan Invernal da Deputación de Lugo garante deste xeito a cobertura de incidencias nas estradas baixo a súa titularidade nos 67 concellos da provincia, cunha atención continuada as 24 horas do día. Ademais deste servizo, outro dos obxectivos deste Plan Invernal é manter emprego, dado que a Deputación de Lugo ven de contratar este servizo a autónomos e pequenas e medianas empresas lucenses. O Plan Invernal realízase con cargo á partida anual que o organismo provincial destina á conservación viaria, e que este ano supera os 3 millóns de euros. Para a posta en marcha deste Plan, e co fin de ofrecer a atención máis eficiente en todos os puntos da provincia, o dispositivo distribúese en oito zonas, cada unha delas dotada con 13 traballadores e 8 vehículos.

As estradas de montaña, como as que percorren os diversos municipios da comarca de Quiroga, concentran durante os meses de inverno a maior parte das incidencias atendidas polo operativo humano e mecánico do Plan Invernal da rede de estradas provincial. EC.

OPERATIVO DISTRIBUIDO EN OITO ZONAS

Así, o dispositivo destinado á zona 8 cubre as incidencias nos 738 quilómetros de estradas provinciais dos municipios de Bóveda, A Pobra do Brollón, Monforte de Lemos, Sober, Pantón, O Saviñao, Taboada, Chantada e Carballedo. Pola súa banda, o operativo da zona 7 abrangue os 313 quilómetros de rede provincial dos concellos de Triacastela, Samos, O Incio, Folgoso do Courel, Quiroga e Ribas do Sil, e que rexistra un dos índices máis altos de actuacións do Plan Invernal. Asimesmo, os municipios de O Páramo, Sarria e Paradela están integrados na zona 4, xunto con Guitiriz, Begonte, Friole, Guntín, Palas de Rei, Antas de Ulla, Monterroso e Portomarín, cun total de 680 quilómetros de vial. Pola súa banda, Láncara inclúese na zona 3, con Meira, Pol, Castro de Rei, Cospeito, Outeiro de Rei, Rábade, Lugo, Castroverde, Baleira, O Corgo e Baralla, cun total de 668 quilómetros de estradas. Ademais, o Plan Invernal conta con 12 saleiros situados en Cervantes, Becerreá, Folgoso do Courel, Ribas do Sil, A Fonsagrada, Navia de Suarna, Riotorto, O Incio, Ourol, O Valadouro, Pedrafita do Cebreiro e Lugo, que estarán provistos de 235 toneladas de sal.•

Deixa unha resposta

Your email address will not be published.

Nova Anterior

O BNG pon en marcha unha campaña informativa no sur de Lugo sobre a Reforma Local

Seguinte Nova

A aplicación MeteoRoute, xa dispoñible para Android

Últimas noticias sobre INFRAESTRUCTURAS

   
A %d blogueros les gusta esto: