Actuacións provinciais para acondicionar o rural do sur lucense

Rematados diversos traballos en parroquias de Pantón e Quiroga

O Deputado de Xestión Interior e Alcalde de Ribas de Sil, Miguel Ángel Sotuela, visitou cos técnicos da Deputación de Lugo as recentes actuacións de mellora en varios puntos do sur lucense. GPDL.

O Plan de Axuda ó Medio Rural impulsado dende a Deputación de Lugo segue a materializarse en diversas actuacións realizadas por toda a provincia. No mes de novembro, o organismo provincial deu por completadas dúas obras no sur de Lugo, nos concellos de Pantón e Quiroga. O pasado 27 de novembro, o Deputado de Xestión Interior e alcalde de Ribas do Sil, Miguel Sotuela, desplazouse ata estes dous municipios para supervisar o resultado destas actuacións, que foron solicitadas polos veciños.

POR SOLICITUDE DOS VECIÑOS DE SAN SALVADOR DE HOSPITAL ACONDICIONOUSE A CONTORNA DA FONTE PÚBLICA

Así, a agrupación veciñal da parroquia San Salvador de Hospital, no concello de Quiroga, solicitara o acondicionamento da contorna da fonte deste núcleo poboacional, o segundo máis habitado trala capitalidade municipal. Os traballos foron financiados integramente pola Deputación de Lugo, con cargo ó Plan de Axuda ó Medio Rural, cun investimento de preto de 6.000 euros.

ARRANXO DE ACCESOS A VIÑEDOS EN PANTÓN, O MUNICIPIO CON MÁIS SUPERFICIE ACOLLIDA Á DENOMINACIÓN RIBEIRA SACRA

Pola súa banda, as aportacións deste Plan provincial serven tamén para facilitar o traballo cotián dos viticultores, no importante sector do viño que está a ser un dos motores económicos do sur de Lugo. Unha destas actuacións levouse a cabo no municipio de Pantón, concello que integra a maior superficie de viñedo acollida á Denominación de Orixe Ribeira Sacra, con máis de 200 hectáreas que dan traballo a preto de 400 persoas. Estes mes completouse o arranxo dos accesos ós viñedos de Guillermina, para o que o organismo provincial destinou 6.000 euros, con cargo ó Plan de Axuda ó Medio Rural.

AXUDAS DE ATA 6.000 EUROS PARA ARRANXOS “DE GRAN IMPORTANCIA PARA OS VECIÑOS”

Este tipo de axudas permiten atender unha ampla diversidade de pequenas melloras que responden a arranxos solicitados polos veciños, e que os concellos non están en condicións de afrontar. Neste sentido, o deputado de Xestión Interior e alcalde de Ribas do Sil, Miguel Ángel Sotuela, destacou “a gran trascendencia que teñen para a veciñanza estas colaboracións, malia súa baixa contía”, xa que o importe de cada axuda concedida non supera os 6.000 euros. O deputado socialista na Deputación explicou que estas achegas do Plan de Axudas ó Medio Rural “supoñen unha axuda fundamental para levar a cabo obras de acondicionamento e dotación de servizos básicos, como accesos a vivendas, explotacións gandeiras ou fincas de traballo”. Sotuela precisou que “en moitas ocasións, os veciños non teñen máis que a colaboración da Deputación para acometelas”.

MELLORA DA CALIDADE DE VIDA NO RURAL E ACONDICIONAMENTO DE ESPAZOS E PEQUENAS INFRAESTRUTURAS AGROGANDEIRAS

O Plan de Axudas ó Medio Rural ten como obxectivo potenciar o sector primario, tanto a través da mellora das infraestruturas para o traballo agrogandeiro como mediante diversas actuacións encamiñadas á mellora da calidade de vida dos veciños do rural. Así, a través desta Plan realizáronse en toda a provincia traballos de acondicionamento de vías de acceso a espazos de traballo, fincas e núcleos poboacionais, arranxo de locais sociais, áreas recreativas, traídas de auga, fontes, cercados de pastizais, curros para o gando ou depósitos de auga para a extención de incendios, co que se potencia o sector primario ademais de dar emprego a unha media de 300 persoas.

O SUR LUCENSE BENEFICIOUSE DE PRETO DE 73.000 EUROS EN AXUDAS DESTE PLAN

Según informaron os responsables provinciais, este ano a posta en marcha do Plan de Axudas ó Medio Rural, dotado con 300.000 euros, supuxo a financiación completa dun total de 120 obras desenvolvidas en 47 concellos da nosa provincia. No sur de Lugo, este Plan provincial financiou o custe completo de 14 obras realizadas en 13 concellos, cun investimento total de preto de 73.000 euros.•

Deixa unha resposta

Your email address will not be published.

Nova Anterior

Convenio da Deputación coa Asociación de Hosteleiros para a dinamización turística da provincia de Lugo

Seguinte Nova

Porto Seco de Monforte: A Xunta formalizou o contrato da conexión coa LU-933 e N-120

Últimas noticias sobre INFRAESTRUCTURAS

A %d blogueros les gusta esto: