Organizadas dende a Vicepresidencia provincial
As áreas de Benestar Social e Deporte da Deputación de Lugo veñen de desenvolver un programa para a formación de pais e nais con fillos deportistas, que baixo o título “Os pais no deporte, importancia e papel”, trata de contribuír, desde a Unidade de Psicoloxía e Coaching Deportivo de Galiza, á formación, ó desenvolvemento e á mellora dos deportistas na nosa Comunidade. O obxectivo principal destas charlas é dotar ós pais, adestradores e directivos, de formación para desenvolver o seu papel na actividade deportiva que practican os seus fillos, para poder así contribuír á súa formación, non só desde o punto de vista físico, senón tamén desde o punto de vista da promoción do benestar e das relacións sociais.
CHARLA CON CASOS PRÁTICOS
A Casa da Cultura de Monforte acolleu unha destas charlas, o pasado 26 de novembro, onde Rubén Domínguez, Hugo Fernández e Rubén López, profesionais da psicoloxía e o coaching no deporte, achegaron estes coñecementos aos pais e nais asistentes. A sesión está integrada por unha parte teórica, con contidos asequibles para o público en xeral, e unha parte máis prática, a través do visionado de vídeos con casos concretos de deportistas e as súas familias. Ó final, a charla rematou cun debate entre os poñentes e o público asistente, que expuxo as súas dúbidas e preguntas, e recibiu diverso material didáctico en forma de folletos explicativos sobre estas cuestións.•
