O CEIP A Gándara, de Monforte, entre os sete centros lucenses que participan nun proxecto pioneiro de voluntariado a través da lectura

O programa «Voluntariado de Lectura-A» inclúese no novo proxecto da Consellería de Cultura, Educación e Ordenación Universitaria para recoñecer e impulsar as actitudes de colaboración e solidariedade entre o alumnado galego a través das bibliotecas escolares. O obxectivo desta iniciativa é estimular o voluntariado cultural en relación coa lectura, o que poderá concretarse a través da colaboración do alumnado nas diferentes actividades desenvolvidas na biblioteca escolar ou a través de actividades de lectura compartida organizadas pola biblioteca, dentro ou fóra do centro, nas que poderán participar, así mesmo, outros sectores da comunidade educativa. De entre os 44 participantes de toda Galicia, ao remate do curso seleccionaranse 4 centros, un por provincia, cuxos estudantes e profesores implicados compartirán as súas experiencias nunha xornadas de convivencia.