Medioambiente, formación e empregabilidade
• Agricultura e gandeiría ecolóxicas, así como o sector forestal sostible, son os eixos que están a marcar a programación formativa que de xeito gratuíto a Deputación de Lugo está a impulsar a través da iniciativa “Fórmate en Verde”, centrada en achegar ós interesados as profesións de futuro vinculadas ó medioambiente e ó desenvolvemento sostible. A finais de novembro comezou unha nova fase deste programa, integrado por seis accións formativas, que incluíron Chantada como lugar de desenvolvemento, ademais de Guitiriz e a Granxa Gayoso Castro. Neste novo ciclo de cursos participaron un total de 250 persoas nas tres sesións celebradas entre o 28 e o 30 de novembro.
MICOLOXÍA E POSIBILIDADES ECONÓMICAS DO CULTIVO ECOLÓXICO DAS SETAS
A sesión formativa de Chantada tivo lugar no edificio sindical, e estivo centrada nas potencialidades da agricultura ecolóxica como sector de desenvolvemento económico. Esta sesión totalmente gratuíta, na que se rexistraron preto de 100 solicitudes de participación, tivo como protagonista ó cultivo ecolóxico de setas, e os asistentes puideron achegarse á produción e comercialización deste produto. O curso ofreceu diversas claves acerca dos últimos sistemas de produción ecolóxica desta especie, así como todos os requisitos e procedementos para acadar a súa certificación dentro do Consello Regulador da Agricultura Ecolóxica de Galicai (CRAEGA). A sesión tamén informou ós asistentes sobre como desenvolver unha comercialización máis eficaz deste produto.
A AGRICULTURA ECOLÓXICA, UN DOS SECTORES ECONÓMICOS CON MAIOR CRECEMENTO EN GALICIA
Según os responsables deste programa, a agricultura ecolóxica está a ser un dos sectores económicos con maior crecemento en Galicia, pasando dos 400.000 euros facturados no ano 2000 ós 21 millóns de euros da actualidade. Pola súa banda, o programa “Fórmate en Verde” achegou a preto de 100 persoas reunidas na Granxa Gayoso Castro as posibilidades económicas da gandeiría ecolóxica, sector que nos últimos 5 anos experimentou un crecemento do 60% nas súas vendas.•
