As obras realizadas contaron con achegas da Xunta de máis de 225.000 euros
O centro da capitalidade de Quiroga ven de gañar en accesibilidade e estética coa mellora da pavimentación e do mobiliario urbano realizada ó longo do nodo comercial da vila.
O COMERCIO, CLAVE NA ECONOMÍA LOCAL
Estas obras foron completadas nestes días, e o resultado supón, según a delegada territorial da Xunta en Lugo, Raquel Arias, “un impulso para o entorno comercial” coa modernización das infraestruturas da zona, “e que se xustifica pola importancia do comercio na dinamización da economía local, ao tempo que actúa como unha rede que vertebra o progreso de toda a nosa comunidade”.
MELLORAS NO PAVIMENTO, BEIRARRÚAS E PRAZAS DE APARCADOIRO
A representante do Executivo autónomico na nosa provincia explicou, durante a súa visita a Quiroga a comezos deste mes, que estas actuacións contaron con axudas da Consellería de Economía e Industria por un importe superior ós 225.000 euros. Así, por unha banda, levouse a cabo na rúa Real a remodelación de beirarrúas, ampliándoas nalgún tramo, e tamén se substituíron diversos puntos de alumeado público, reformáronse os bordos, e remodelouse a zona de aparcamento, aumentando o ancho das prazas en distintas localizacións. Este proxecto supuxo un investimento de 151.475 euros, dos que a Consellería de Economía e Industria, a través da Dirección Xeral de Comercio, subvencionou o 60%, aportando 90.000 euros.
SOTERRAMENTO DO CABLEADO
Por outra banda, estanse a realizar traballos do proxecto de soterramento de liñas eléctricas no entorno do auditorio municipal, e que contan cun investimento de 76.363 euros, dos que a Consellería de Economía e Industrial achega o 80% deste importe, con 61.090 euros de axuda. Arias destacou que esta actuación “é necesaria, porque a demandan os concellos, e reforza a seguridade da veciñanza”.•
