O Círculo Saviñao celebra o seu 55 aniversario

O pasado 21 de decembro, o Círculo Saviñao cumpliu 55 anos. Como está de saúde?

Ben, con ánimo para seguir tendo presenza no Saviñao mantendo o espírito co que naceu: ser un lugar de encontro de xentes con idades e ideas diversas que valoran convivir nunhas instalacións súas, nun lugar distinto, dinámico e aberto, coa posibilidade de recibir novas de calquera eido do saber ou do entretemento, e ademais autofinanciándonos, só con algunhas axudas institucionais finalistas e esporádicas. Non lle debemos a existencia a ninguén máis que ós socios.

O mundo cambiou moito dende 1958. En que cambiou esta Asociación Cultural e Recreativa?

Para ben, en que se remataron os enormes agobios económicos cos que viviu a nosa sociedade durante toda a súa historia, creo que gracias a unha xestión prudente dos cartos dos socios. Creo que tamén para ben no ámbito cultural. Temos un centro que leva recibido a importantes intelectuais e persoeiros de Galicia e de España e celebrado centos de actos de interese, sendo un foco de atención para a xente máis espelida do noso entorno. Para mal, en que, a pesar de que agora non hai censura como daquela, a xente nova non ven detrás empuxando e non abunda na actividade do Círculo Saviñao, polo que, como case todos os Círculos e Casinos Culturais, non estamos a vivir unha sana renovación xeracional. En 1958 eran os xóvenes quen levantaban a sociedade, incluso co seu esforzo persoal; en 2014 a maioría da xente nova non ve, de momento, a necesidade dun centro cultural e recreativo no Saviñao.

Os preto de 200 socios que dan vida ó Círculo Saviñao son unha boa cifra, nos tempos que corren. Defina brevemente as características do “bo/a socio/a” do Círculo.

Os socios do Círculos Saviñao o son de calidade: a maioría levan comprometidos coa entidade décadas e non regatean medios para vela medrar. Disfrutan cos seus éxitos e cos servicios que ofrecemos, aínda que non acudan habitualmente polo local social. Atrévome a dicir que son os mellores veciños: desinteresados, colaboradores e solidarios. Saben ver que a sociedade é boa para o pobo e para quen o habita. Pero necesitamos máis. A crise demográfica do interior de Galicia, sen dúbida a crise máis grave que estamos a sufrir, tamén nos afecta, e temos desde hai anos máis baixas que altas, polo que aproveito para chamar a todos os saviñenses bos e xenerosos para que valoren a existencia dunha entidade cultural-recreativa en Escairón e que se fagan socios, o único xeito de garantir a nosa actividade e, sobre todo, o noso futuro.

A directiva que vostede preside amosa unha vitalidade extraordinaria. Xa terán trazadas as liñas para celebrar estes 55 anos de Sociedade…

Estamos niso. Empezamos cunha serie de actos durante o Nadal que queremos continuar durante o ano que estamos, na mesma liña que viñemos desenrolando ata aquí: conferencias, literatura, teatro, pintura, música, bailes,… Actos cos que queremos colaborar a facer de Escairón e da nosa comarca un entorno máis dinámico, atractivo e con inquietudes diferentes.•