O equipo formado por Eloy Pérez e Sonia López consiguen o duodécimo posto na xeral, nunha proba dura climatoloxicamente e na que participaron 173 pilotos

Durante a fin de semana do 25 ó 26 de xaneiro disputouse na localidade portuguesa de Braga o 6º Cam Rali Festival. Un total de 173 pilotos tomaron parte nesta proba, desenvolvida no Circuito Vasco Sameiro, cunha alta participación española.

GRAN ACTUACIÓN A PESARES DA CHUVIA

O sur de Lugo estivo representado pola Escudería Terra de Lemos, que participou co equipo integrado por Eloy Pérez e Sonia López. Os monfortinos completaron unha brillante actuación a bordo do seu BMW M3, a pesares da chuvia incesante durante toda a xornada. O tandem Pérez-López rematou a proba nun estupendo duodécimo posto na clasificación xeral, vencendo na súa categoría e división. «É un resultado moi satisfactorio, sobre todo tendo en conta as condicións meteorolóxicas, nada propicias para os coches de propulsión traseira, e o altísimo nivel de participantes», explicaron.•