O Concello está a instalar unha pérgola para uso dos comerciantes

O Concello de Monforte iniciou recentemente os traballos para a instalación dunha pérgola no lateral do Parque dos Condes, onde se desenvolve o mercadillo dominical e as diferentes actividades comerciais e expositivas en diversos eventos festivos ó longo do ano. O pasado día 13, a Dirección Xeral de Patrimonio paralizou as obras “tras recibir unha denuncia e comprobar comprobar que o Concello non solicitara a preceptiva autorización previa”.

INFORME DE PATRIMONIO SOBRE ESTE PROXECTO

Dende Patrimonio explicaban que o Concello de Monforte contaba con dous proxectos autorizados para a zona das casetas, pero ningún para executar unha pérgola de 40 metros a continuación das mesmas. Os responsables de Patrimonio informaron tamén de que en febreiro de 2013 autorizouse un proxecto que contemplaba unha reforma das casetas e a construción dunha pérgola de 25 metros que se situaría a continuación. Según Patrimonio, “sen ter comezados os traballos, en outubro de 2013 o concello presentou un modificado do proxecto, referido única e exclusivamente ao tramo das casetas e no que anunciaba que deixaba previsto o espazo de colocación doutra pérgola para unha execución futura, pero sen concretar as características técnicas, pois este elemento sería obxecto dunha solicitude posterior”. Esta intervención tamén obtivo a autorización de Patrimonio nos termos en que se presentaba, é dicir, sen incluír ningunha actuación máis alá da zona que na actualidade ocupan as casetas. Según isto, e en base á resolución da Dirección Xeral de Patrimonio, o Concello terá que limitar a 25 metros a lonxitude da pérgola que se propón construír, repoñer o chan do Parque dos Condes nos outros 15 metros afectados pola intervención paralizada, e presentar outra proposta de actuación se pretende ampliar ou modificar o autorizado.

O PP ESIXE ACLARACIÓNS SOBRE O FUTURO DA OBRA

O feito de que Patrimonio dera a orde de paralizar os traballos levantou a polémica política a nivel municipal. Julia Rodríguez, voceira do PP, falou de “despropósito na xestión municipal”, e conminou ó alcalde a “aclarar se a obra se vai realizar en función da autorización que se obtivo de Patrimonio, ou se o Goberno local vai persistir na colocación dunha estrutura de 40 metros de largo, para o que tería que solicitar un novo permiso”.

OS SOCIALISTAS CRITICAN QUE ESTA “CHAPUZA” SE SUME A “OUTRAS ACTUACIÓNS SIMILARES”

Pola súa banda, o voceiro socialista, José Tomé, presentou un escrito no Concello onde solicitaba copia de todos os documentos que integran o expediente desta obra, ó tempo que criticou a imaxe de “chapuza” que se está a transmitir á sociedade “cunha obra que non se adapta ó previamente autorizado, que se modificou sen permiso nunha zona afectada, e que vense a sumar a outras actuacións en similares circunstancias que ten feito o Concello nos últimos anos, corrixidas tamén por Patrimonio, pero que tiveron un elevado custe para os veciños de Monforte”.

O GOBERNO LOCAL DEFENDE A EXISTENCIA DOS PERMISOS, E DE QUE A PARALIZACIÓN VEU “SÓ POR UN CAMBIO NA ORDE DE EXECUCIÓN DAS OBRAS”

A concelleira de Facenda e primeira tenente de Alcalde do Concello de Monforte, Mª José Vega Buján, criticou que o voceiro socialista “a pesar de manexar o expediente de solicitude de autorización a Patrimonio, continúe insistindo na hipotética ausencia desta autorización”. Vega Buján explicou tamén que “o único delito que cometemos foi cambiar a orde de execución das pérgolas, entendendo que Patrimonio informara favorablemente a última petición do Concello, cuestión na que radica a diferenza de interpretación”. A concelleira nacionalista sinala que “no caso de ter empezado a obra pola zona das casetas, tal como tiñamos previsto inicialmente e antes de que os propios vendedores do mercado nos solicitasen que o fixésemos na zona máis próxima á rúa Cardeal, non habería ningún problema”. “O Concello entende que dá igual a orde de execución do proxecto, cousa que para Patrimonio non é así”, suliña Vega Buján, que explica que “Patrimonio autorizou desde un primeiro momento a actuación na zona do auditorio e, despois de que o Concello modificase a utilización dalgúns materiais na construción da pérgola, non puxo reparos no seu segundo informe con data de febreiro de 2013”.•