Cando aínda a cidade do Cabe estase a recompoñer tralo impacto do primeiro premio da Lotería de Reis, que caiu íntegro en Monforte, un grupo de monfortinos e monfortinas sorprendía a todos presentando unha iniciativa singular, da que non se coñecen precedentes noutras vilas tocadas pola deusa Fortuna. O pasado 25 de xaneiro, nove cidadáns procedentes de diversos ámbitos sociais e empresariais da vila facían pública unha iniciativa para crear unha fundación que administre, en beneficio do progreso de Monforte, fondos procedentes deste premio da Lotería e de achegas de particulares.
XERAR IDEAS PARA QUE O DIÑEIRO DO PREMIO REVERTISE EN MONFORTE
O anfitrión do acto, celebrado no Centro do Viño de Monforte, foi Severino Rodríguez, que xustificou a súa presencia «en calidade de Alcalde de Monforte, aínda que os protagonistas son os cidadáns que tiveron a idea». O rexedor local explicou que a iniciativa partiu dalgúns agraciados no sorteo de Reis, e que a idea naceu marcada cun carácter de axuda social, aínda que despois de varias reunións, foi ampliando o seu campo de acción. Severino Rodríguez destacou como idea sustancial desta iniciativa «que o diñeiro do premio revertise en Monforte». A materialización desta idea tería como primeiro paso crear unha asociación que botase a andar oficialmente e a través da que se puidese avanzar na creación dunha fundación, baixo a posible denominación de «Fundación Semente de Monforte de Lemos», nome que aglutinaría a idea de sementar coa referencia á mente, ás ideas. A asociación sería un paso previo á fundación, «xa que este tipo de figuras xurídicas teñen un trámite máis complicado e que require de tempo», explicou o alcalde, e coa asociación legalmente constituída, abrirase unha conta bancaria para recibir as achegas económicas, procendentes dos premios ou de calquer outra aportación cidadá.
UNHA FUNDACIÓN DE CARÁCTER SOCIAL E DE APOIO ÓS EMPRENDEDORES
Severino Rodríguez precisou que a fundación que se pretende crear tería unha doble finalidade. Por unha banda, esta entidade adicaría parte do diñeiro recadado a adquirir alimentos e artigos de primeira necesidade con destino ós cidadáns e cidadás de Monforte máis necesitados. Esta actuación complementaríase, según explicou o alcalde, coa creación dunha liña de becas para financiar os estudos universitarios da mocidade con poucos recursos económicos. Por outra banda, a fundación destinará parte dos seus fondos para financiar proxectos empresariais que se vaian desenvolver en Monforte. Con este fin, crearíase unha páxina web que serviría para recoller as iniciativas e proxectos procedentes de calquer punto do Estado, e que serán valorados por unha comisión integrada por expertos vinculados a Monforte e ás universidades galegas, co fin de decidir a que proxectos se destina a financiación.
UN PROXECTO «DE TODA A CIDADE»
O alcalde de Monforte rematou a súa intervención manifestando sentirse «orgulloso de que houbera cidadáns que tivesen esta idea despois de recibir un premio económico», e destacou que este «é un proxecto de toda a cidade», ó tempo que agradeceu a implicación de dúas das monfortinas máis universais, en referencia á expresidenta do Tribunal Constitucional, Mª Emilia Casas, presente no evento, e á periodista Julia Otero, que non puido acudir á presentación do proxecto. As demais persoas vinculadas a esta iniciativa proceden do mundo da educación, como Sara Fernández, Manuel López Eiriz e José Ramón Casanova; do eido da empresa, como César Vázquez e Ovidio Pérez Reñones; e tamén do mundo da cultura, como Pilar López e Ramón Rodríguez. Os presentes destacaron que a asociación que se constitúa desaparecerá unha vez exista a fundación, ou tamén se, finalmente, esta non se chegase a crear. Neste caso, os fondos recadados destinaranse a fins sociais. Os promotores da idea suliñaron que a constitución da fundación vai depender da resposta económica da cidadanía, e precisaron que esta iniciativa «está aberta á participación de todas as persoas que o desexen».•
