O vicepresidente da Xunta valorou ós concellos que mancomunan servizos

O 24 de xaneiro, o vicepresidente da Xunta, Alfonso Rueda, visitou os concellos de Carballedo e Chantada para comprobar de primeira man os investimentos realizados con cargo ó Fondo de Compensación Ambiental, acompañado pola secretaria territorial de Lugo, Marta Barreiro, e os rexedores de Carballedo e Chantada, Julio Yebra e Manuel Lorenzo Varela.

CARBALLEDO E CHANTADA, “EXEMPLO DE PRESTACIÓN CONXUNTA DE SERVIZOS”

Rueda destacou o exemplo dos dous concellos ao concorrer á subvención do Fondo de Compensación Ambiental de xeito conxunto. Según suliñou o vicepresidente da Xunta, este esforzo ten permitido levar a cabo unha actuación de arredor de 70.000 euros para mellorar o alumeado público de varias parroquias en ambos municipios e lograr unha maior eficiencia enerxética. Alfonso Rueda lembrou que a Xunta está a impulsar a cooperación dos concellos galegos e a “discriminar positivamente nas súas subvencións aos que apostan pola prestación conxunta de servizos”, como é o caso de Carballedo e Chantada. “Así os concellos teñen máis opcións no reparto de axudas e poden xerar economías de escala que se traducen en aforros”, explicou Alfonso Rueda.

“AFORRO, EFICIENCIA E MELLORES SERVIZOS Á CIDADANÍA” POLA COLABORACIÓN ENTRE CONCELLOS E XUNTA

Neste caso concreto, ademais de aforrar por apostar pola eficiencia enerxética no seu alumeado, tamén se aforraron preto de 3.000 euros ao contratar conxuntamente a actuación e non facelo por separado. Unha vez máis a coordinación entre os concellos, e destes coa Xunta, ten permitido levar a cabo iniciativas que benefician tanto aos veciños como ao medio ambiente, “que é o espírito do fondo que xestiona a Vicepresidencia”, precisou Alfonso Rueda. O vicepresidente explicou que “cada vez existe máis cultura de colaborar entre os distintos entres locais, o cal permite evitar duplicidades, ser máis eficientes e ofrecer mellores servizos aos cidadáns, que é o obxectivo que deber perseguir todas as Administracións”.

BENEFICIOS DO FONDO DE COMPENSACIÓN AMBIENTAL

O Fondo de Compensación Ambiental, unha iniciativa que a Xunta puxo en marcha en 2010, permitiu que por vez primeira os concellos galegos puideran beneficiarse directamente da explotacións eólicas, posto que as actuacións que se realizan son financiadas a través do canon eólico. O Fondo representa un triplo beneficio para os concellos, xa que axuda ás súas facendas, coopera na conservación do medio natural, e aposta polo reequilibrio territorial, xa que beneficia sobre todo a municipios pequenos e do interior.•