Etnografía e memoria festiva na exposición sobre os Reis de Bóveda

A exposición inclúe fotografías desta singular celebración dende 1948

A exposición do Centro Sociocultural permite viaxar no tempo para coñecer esta longa tradición en Bóveda. (Foto cedida Delegación Cultura Concello Bóveda).
A exposición do Centro Sociocultural permite viaxar no tempo para coñecer esta longa tradición en Bóveda. (Foto cedida Delegación Cultura Concello Bóveda).

Dende a Delegación de Cultura do Concello de Bóveda están a ofrecer unha serie de actividades que van máis aló da intervención no lecer ou na cultura, para mergullarse no interesante mundo da historial local. Unha mostra deste traballo a medio camiño entre a investigación e a divulgación é a exposición fotográfica sobre a tradición da Festa de Reis en Bóveda, que amplía o seu prazo ata o 24 de febreiro no Centro Sociocultural. Dende a Delegación de Cultura do Concello veñen a preparar con especial atención a Cabalgata de Reis, como resposta a unha tradición moi arraigada en todo o municipio. Botando man de testemuñas orais da veciñanza, e coa aportación, por parte destes veciños e veciñas que de nenos e novos disfrutaron e participaron nos Reis, os responsables de Cultura do Concello compuxeron esta exposición fotográfica de gran valor etnográfico.

A tradicional cabalgata de Reis foise modernizando co paso do tempo, adaptándose ós recursos e á creatividade de cada época. (Foto cedida Delegación Cultura Concello de Bóveda).
A tradicional cabalgata de Reis foise modernizando co paso do tempo, adaptándose ós recursos e á creatividade de cada época. (Foto cedida Delegación Cultura Concello de Bóveda).

30 VECIÑOS PARTICIPARON NA REPRESENTACIÓN DO 6 DE XANEIRO DE 1948

As fotos máis antigas remontan a finais dos anos 40, cando don Andrés Salgado Pérez, que acabara de mestre en Rubián e Teilán, promovera unha representación dun auto sacramental o 6 de xaneiro de 1948 na que participaran preto de 30 xóvenes da parroquia. Según contan os máis vellos, esta obra “trouxéraa un señor de Castela que traballaba no ferrocarril, e que xa se representara antes da guerra dúas veces”. O escenario fora o campo da feira de Rubián, e os veciños botaron dous meses entre ensaios e preparación de traxes e escenografía.

ADAPTACIÓN DA CABALGATA ÓS TEMPOS

Logo do parón que supuxo a emigración, a festa recupérase nos anos 60, cando chega a Bóveda don Modesto. A gran tarefa de dinamización sociocultural que fixo este cura na parroquia é recoñecida polos veciños, que din que incluso don Modesto implicábase na cesión das roupas necesarias para representar “os Reis de Bóveda”. De 1963 é a primeira Cabalgata celebrada no municipio, cando os Reis ían dacabalo acompañados de gran cantidade de paxes e figurantes. A evolución da tradicional cabalgata dende entón ata agora rexistra cambios no itinerario, debidos sobre todo ó aumento do tráfico rodado; e tamén no medio de transporte, xa que os cabalos reais foron sustituidos nos 70 por pequenos tratores con remolque. Varias e diversas foron as mudanzas nesta celebración, que, iso sí, segue a manter intacto o espíritu festivo dun pobo.•

Deixa unha resposta

Your email address will not be published.

Nova Anterior

Saleta Fernández, campiona galega de salto de altura

Seguinte Nova

Febreiro, mes de comadres, compadres e volantes en Monforte e Chantada

Últimas noticias sobre CULTURA

   
A %d blogueros les gusta esto: