O presidente da Xunta de Galicia, Alberto Núñez Feijóo, asistiu ó acto de inauguración
• A nova potabilizadora de Ribasaltas supuxo un investimento de 6,2 millóns de euros, dos que a Xunta aportou 2,5 millóns, Acuaespaña 3 millóns, e o Concello de Monforte 612.000 euros •Con esta infraestrutura, mellora en cantidade e calidade a auga potable do suministro da cidade de Monforte
O 13 de febreiro quedou inaugurada en Ribasaltas a nova estación de tratamento de auga potable de Monforte, que permitirá un mellor servicio de suministro para os preto de 20.000 veciños da cidade do Cabe.
NÚÑEZ FEIJÓO: «A PESARES DA CRISE, A XUNTA MANTÉN O SEU COMPROMISO COA GALICIA INTERIOR E COA MELLORA DAS SÚAS DOTACIÓNS»
O acto de inauguración da nova potabilizadora contou coa presencia do presidente da Xunta de Galicia, Alberto Núñez Feijóo, destacou «a importancia nestes tempos de crise, de manter e cumprir os compromisos de investimento coa Galicia interior», en referencia ós 2,5 millóns de euros que a Xunta de Galicia aportou para levar adiante esta infraestrutura, completando o investimento de 3 millóns de euros de Acuaespaña, e de 612.000 euros aportados polo Concello de Monforte, ata sumar os 6,2 millóns de euros que supuxo esta infraestrutura.
SEVERINO RODRÍGUEZ, ALCALDE DE MONFORTE, GABOU «O COMPROMISO DA XUNTA DE GALICIA CON MONFORTE» POR TER REMATADA A NOVA ETAP DENTRO DO PRAZO PREVISTO
Os responsables autonómicos tiñan previsto que a nova potabilizadora de Ribasaltas estivese lista para entrar en funcionamento a comezos do ano 2014. Neste sentido, o alcalde de Monforte de Lemos, Severino Rodríguez, gabou o «compromiso da Xunta de Galicia, e do seu presidente, Alberto Núñez Feijóo, coa cidade de Monforte» polo feito de ter rematada a nova potabilizadora dentro dos prazos previstos. Asimesmo, Severino Rodríguez agradeceu «o compromiso da empresa construtora», Construcciones San José, polo seu desenvolvemento profesional no cumprimento dos prazos.
A XUNTA INVESTIRÁ ESTE ANO EN MONFORTE 14 MILLÓNS DE EUROS, E AS OBRAS DOS ACCESOS Ó PORTO SECO COMEZARÁN EN MARZO
A nova estación de tratamento de auga potable de Ribasaltas trátase dunha obra hidráulica que ampliará o sistema de abastecemento do Concello de Monforte, xa que mellorará a calidade do abastecemento e permitirá pasar dos 200 litros por segundo actuais aos 300 litros por segundo coas novas instalacións. Durante o acto de inauguración da ETAP de Ribasalta, Alberto Núñez Feijóo lembrou que o compromiso da Xunta con Monforte vai máis aló desta nova potabilizadora, en referencia ós 14 millóns de euros que o Goberno galego ten incluídos nos Orzamentos para este ano, destinados ás obras do corredor Sarria-Monforte, e para os accesos ó Porto Seco, cuxas obras comezarán no mes de marzo.•
