Respostas ás demandas da veciñanza na comarca de Chantada

Denuncian a “discriminación” que sufren os veciños ó ter que marchar do seu municipio ou incluso da provincia

A mediados deste mes, o deputado socialista no Parlamento de Galicia Vicente Docasar desplazouse ata Carballedo para coñecer de primeira man as necesidades dunha residencia para maiores nun municipio onde a maior parte da poboación supera os 65 anos de idade.

A RESIDENCIA DE MAIORES DE CARBALLEDO, UNHA “CUESTIÓN URXENTE E PRIORITARIA”

Docasar, acompañado pola voceira do Grupo municipal socialista no Concello de Carballedo, Isabel González Blanco, e polo secretario de Organización do partido, Carlos Ferreiro, explicou que a construción dunha residencia para a terceira idade en Carballedo é “unha cuestión urxente e prioritaria”, xa que este municipio non conta con ningún centro destas características para atender ós maiores, que deben recurrir a residencias espalladas por outros concellos da zona sur de Lugo, ou incluso trasladarse a centros doutras provincias, “coas lóxicas dificultades de desarraigo para os maiores e para as súas familias”. Os socialistas explicaron que esta situación vese agravada polo feito de que “unha boa parte destes potenciais usuarios viven sós e contan con poucos recursos económicos”.

DOCASAR: “PARA O PP, OS VECIÑOS DA GALICIA INTERIOR SÓ INTERESAN EN CAMPAÑA ELECTORAL”

Vicente Docasar anunciou que o Grupo Parlamentario Socialista vén de rexistrar varias iniciativas na Cámara galega, para que “o Partido Popular concrete as previsións que manexa a Xunta de Galicia con respecto á construción e posta en marcha desta infraestrutura que, malia ser prometida en reiteradas ocasións polo Alcalde desta localidade, lamentablemente hoxe aínda non é unha realidade”. O socialista criticou que “para o Partido Popular os veciños e veciñas da Galicia interior só son importantes en campaña electoral, e pasadas as eleccións, o resultado é abandono e ninguneo total ata o seguinte proceso electoral”. Vicente Docasar explicou que o Concello de Carballedo conta dende hai tempo cos terreos necesarios para levar adiante esta actuación, xa que existe no colexio público da Barrela unha parte sen utilizar, e que serviría perfectamente para albergar a residencia. Docasar criticou ademais que o alcalde de Carballedo “teña anunciado reiteradamente que esta obra tamén conta con todos os permisos e bendicións necesarias para iniciarse, polo que non entendemos a que se debe esta falla de vontade política”. O deputado monfortino recoñeceu ter constancia de que o proxecto de construción, valorado en 22.000 euros, xa está elaborado, e que o Goberno galego comunicou oficialmente, por escrito, ó Concello que nada impide o inicio das obras.•