Solicitan a replantación “metódica” de árbores na Devesa de Escairón

Dende a Asociación Veciñal de O Saviñao

Ademais, piden á Deputación provincial o arranxo da estrada Escairón-Currelos

A Asociación Veciñal de O Saviñao vén de cursar ó Concello unha solicitude para unha nova intervención na Devesa de Escairón, consistente na reposición “metódica e permanente” da masa arbórea desta arboreda que consideran “significativa e representativa para todos os veciños do municipio”. A idea é ir substituíndo pouco a pouco as pezas que van desaparecendo cos anos, xa que este procedemento ten demostrada a súa eficacia no feito de que, según precisan dende o colectivo veciñal, a Devesa conta hoxe en día cun volume arbóreo “maior do que foi hai vinte anos”.

REPLANTACIÓN DE OITO ÁRBORES PARA REPOÑER A MASA ARBÓREA

No seu escrito ó Concello, a Asociación Veciñal de O Saviñao solicita a replantación de catro carballos que se plantaron o ano pasado e non prenderon. Ademais, piden que se plante un carballo na zona traseira do Xulgado de Paz, para que sirva de sustituto dun carballo situado nese punto e que está a piques de secar. Asimesmo, solicitan que se planten tres castiñeiros de indias para manter a liña destes exemplares arbóreos na beirarrúa da zona baixa da Devesa.

ACTUACIÓNS ESPECIALIZADAS PARA CONSERVAR OS EXEMPLARES CENTENARIOS

Xunto con estas peticións concretas, dende a Asociación Veciñal de O Saviñao solicitan que se estableza unha atención específica ós exemplares centenarios deste espazo singular. O colectivo veciñal propón que, cada dez anos, un equipo de técnicos especializados proceda a unha poda e cerna de todas as partes secas para evitar a extensión da corrosión, así como o correcto selado dos cortes e feridas , e o remodelado e poda dalgunhas pezas que teñen perigo de fractura. Dende o colectivo veciñal defenden que se destine “unha pequena parte do presuposto municipal para tratar de conservar e facer perdurar este patrimonio natural, que é o mellor legado que podemos deixar ás xeracións futuras”.

SOLICITUDE DE REBACHEO E REPOSICIÓN DA CAPA DE RODADURA NA LU-P4102 ENTRE ESCAIRÓN E CURRELOS

Por outra banda, a Asociación Veciñal de O Saviñao presentou este mes un escrito diante da Xestión Territorial da Deputación de Lugo solicitando arranxos na estrada provincial LU-P4102, que comunica Escairón e Currelos, “un dos principais eixos de comunicación viaria do municipio de O Saviñao”. O colectivo veciñal alerta da “perda total” da capa de rodadura e a apertura de focharcas, “co conseguinte risco de sinistros”, polo que solicitan o rebacheo puntual da estrada ó seu paso por Gorgozo, no punto de intersección e desvío a Vilaesteva e Corneas, e o arranxo das focharcas no lugar de Xuvencos. Ademais, piden a reposición íntegra e arranxo estructural da capa de rodadura no traxecto de tres quilómetros entre Escairón e Vilarreme, así como quilómetro que vai dende a entrada á Portela ata Vilachá. Reclaman tamén repoñer a capa superficial de rodadura no quilómetro 19 desta estrada, entre a saída de Xuvencos e o paso da estrada pola ponte do río Sardiñeira. Dende a Asociación solicitan que a totalidade destes arranxos estea completada antes do verán.•

Deixa unha resposta

Your email address will not be published.

Nova Anterior

O IES Daviña Rei participa no programa Eduemprende, para o fomento da cultura emprendedora

Seguinte Nova

Mobilizacións en Sarria contra o encauzamento do tramo urbano do río

Últimas noticias sobre ASOCIACIONISMO

A %d blogueros les gusta esto: