Monforte organiza a súa VI Carreira Popular o domingo 30 de marzo, co obxectivo de promover a afección ó atletismo, ademais de lograr a participación do maior número posible de atletas de nivel, e, asimesmo, contribuír á potenciación do deporte de base cunha masiva participación dos colexios nesta actividade.
A proba consta de dúas categorías básicas; por unha banda, a categoría de menores, con saída ás 11,00 horas, e a de adultos, con saída ás 12,00. O circuíto das categorías menores localizarase na zona da Compañía, Dalmiro de la Válgoma e Escultor Francisco Moure.
O trazado da carreira de adultos ronda os 7.000 metros, con 2 voltas a un circuíto que sae da Compañía e continúa por rúa Carude, estrada de Sober ata a Escola Taller, xiro de 180 graos e se volve pola estrada de Sober dirección San Lázaro, Reboredo, Dalmiro de la Válgoma, Rúa Escultor Francisco Moure e novamente liña de saída, así ata completar dúas voltas e rematar na liña de meta ubicada na Praza da Compañía.
As inscricións poderán facerse de xeito presencial (para as dúas categorías) dende o día 17 na Oficina de Deportes; ou a través da páxina web www.championchipnorte.com (só adultos); ou por correo electrónico: lodeco@lodeco.es (só categorías menores). Non se aceptarán inscricións por teléfono ou fax.
A Carreira conta coa colaboración de Gadis e Xoiería Camilo, e o patrocinio da Vicepresidencia 1ª da Deputación de Lugo e do GDR Ribeira Sacra.•
