Bota a andar a primeira fase do Porto Seco de Monforte

As parcelas saíron a concurso cun prezo medio de 60 euros por metro cadrado

O presidente da Xunta de Galicia e o alcalde de Monforte descubren a placa conmemorativa da posta en servizo, o pasado 28 de febreiro, da primeira fase do Porto Seco de Monforte. CMATI
O presidente da Xunta de Galicia e o alcalde de Monforte descubren a placa conmemorativa da posta en servizo, o pasado 28 de febreiro, da primeira fase do Porto Seco de Monforte. CMATI

O pasado 28 de febreiro tivo lugar a posta en servizo da primeira fase do Porto Seco de Monforte, un día longo tempo esperado en toda a comarca de Lemos, e que inicia unha nova etapa nas posibilidades de desenvolvemento económico e empresarial do sur de Lugo.

NÚÑEZ FEIJÓO: «O PORTO SECO QUERE DEVOLVERLLE A MONFORTE O PROTAGONISMO FERROVIARIO EN GALICIA»

O presidente da Xunta de Galicia, Alberto Núñez Feijóo, asistiu ó descubrimento da placa conmemorativa da posta en funcionamento desta infraestrutura, que ambiciona «devolverlle a Monforte o protagonismo ferroviario» que tivo a nivel galego, e a converter esta área no principal espazo de actividades loxísticas intermodal estrada-ferrocarril de Galicia. Neste sentido, Feijóo lembrou que o Porto Seco de Monforte xa acadou a súa inclusión dentro do nó loxístico da rede transeuropea de transportes. Na apertura da primeira fase desta infraestrutura, o alcalde de Monforte, Severino Rodríguez, suliñou que a cidade do Cabe «ten hoxe dúas cousas que non ten ningunha cidade de Galicia, e que son a única plataforma loxística lista para recibir empresas, e moitas posibilidades e alternativas vantaxosas para a instalación de industrias». Na súa intervención, o alcalde de Monforte afirmou que «este proxecto foi posible porque toda a cidadanía creu nel, e porque moitas persoas se implicaron no mesmo». Severino Rodríguez fixo unha mención especial ó anterior alcalde, Nazario Pin, xa que «foi a primeira persoa que creu neste proxecto e ó que hai que recoñecer o seu traballo». Pola súa banda, o conselleiro de Medio Ambiente, Territorio e Infraestruturas, Agustín Hernández, destacou que «o 28 de febreiro de 2014 marca o inicio dunha senda que rematará coa recuperación da identidade ferroviaria de Monforte». O titular autonómico de Infraestruturas suliñou que co Porto Seco de Monforte «situamos a Galicia no escenario de comunicación intermodal».

O PLAN DE VENDA DE SOLO INDUSTRIAL ABARATOU UN 15% DE MEDIA OS PREZOS DAS PARCELAS DO PORTO SECO

A Xunta de Galicia fixo pública o día 5 deste mes a convocatoria do concurso para a venda das 13 parcelas nas que se dividen os 53.993 metros cadrados de solo industrial que compoñen a primeira fase do Porto Seco de Monforte. Doce destas parcelas están destinadas a usos industriais e terciarios, e a restante a operacións de carga, descarga e almacenaxe de mercadorías. O prezo medio das parcelas é de 60,52 euros por metro cadrado; as dúas parcelas de maior tamaño (a destinada a almacenaxe de mercadorías e máis a parcela de 17.782 m2, que se destina a uso industrial) están á venda por 51 de 52 euros o metro cadrado, respectivamente. As restantes parcelas, que oscilan entre os 524 e os 6.417 m2, ofértanse por 67 euros o metro cadrado. Estes prezos supoñen un abaratamento dunha media do 15% respecto do importe inicialmente previsto, debido á posta en marcha do Plan de Venda de Solo Industrial, iniciativa da Xunta de Galicia que, según explicou Núñez Feijóo en Monforte, «contén 17 medidas para facilitar ós emprendedores o acceso a un total de 2,8 millóns de metros cadrados de superficie empresarial en Galicia en condicións vantaxosas». Así, as bases do concurso da venda das parcelas do Porto Seco permiten pagar o 30% máis o IVE ó escriturar, aprazando o 70% restante ata un máximo de 5 anos con aval bancario e cun xuro equivalente ó interese legal no momento de firmar a compravenda, ou ata 6 meses con aval bancario.Os criterios establecidos para a adxudicación das parcelas do Porto Seco dan prioridade ás empresas de actividade loxística, e tamén á ampliación de empresas xa existentes ou a creación doutras novas. Tamén se valorará o carácter de economía social da empresa creada ou dirixida por mozos menores de 35 anos ou por mulleres. O prazo para presentar as solicitudes de compra das parcelas remata o 5 de maio de 2014.

O presidente da Xunta de Galicia, Alberto Núñez Feijóo, lembrou en Monforte que o Plan Impulsa Lugo recolle o Porto Seco como unha das súas medidas prioritarias, e como un medio para incrementar as exportacións galegas. CMATI
O presidente da Xunta de Galicia, Alberto Núñez Feijóo, lembrou en Monforte que o Plan Impulsa Lugo recolle o Porto Seco como unha das súas medidas prioritarias, e como un medio para incrementar as exportacións galegas. CMATI

A XUNTA DESTINARÁ MÁIS DE 13 MILLÓNS DE EUROS NO TOTAL DO PORTO SECO

A primeira fase do Porto Seco de Monforte abrangue 145.745 m2, o que supón o 47,46% dos 307.053 m2 do total da infraestrutura. Nesta primeira fase, o solo empresarial ocupa 53.993 m2, e a superficie restante adícase a vías e aparcadoiros (45.725 m2), zona verde (23.775 m2), e equipamento (19.380 m2), destinando 2.872 m2 á plataforma intermodal. O investimento total previsto polo Instituto Galego da Vivenda e Solo no Porto Seco de Monforte supera os 13 millóns de euros, dos que preto de 6 millóns corresponden á súa primeira fase.

MONFORTE, CLAVE NO TRANSPORTE MULTIMODAL DO SUROESTE EUROPEO

Esta aposta da Xunta de Galicia pola infraestrutura de Monforte xustifícase, según explicou o mandatario autonómico, en que o Porto Seco “é unha peza clave no aproveitamento das oportunidades de Galicia como plataforma loxística do multimodal do suroeste europeo”. Núñez Feijóo destacou a situación estratéxica de Monforte “a dúas horas dos principais portos de interese galego, e a menos dunha hora e tres cuartos dos aeroportos da comunidade”, o que convirte ó Porto Seco monfortino “nunha infraestrutura decisiva e fundamental para o futuro desenvolvemento empresarial e loxístico de Galicia”.

POSIBLE CELEBRACIÓN EN MONFORTE DUN FORO LOXÍSTICO MULTIMODAL

Para activar a proxección internacional desta infraestrutura, a Xunta de Galicia está a impulsar diferentes actuacións das que o mandatario galego ofreceu un adianto na súa visita a Monforte. Por unha banda, Núñez Feijóo anunciou o traballo conxunto que se está a desenvolver entre Xestur, Igape e ADIF para a promoción e divulgación do Porto Seco dentro da estratexia de internacionalización da Xunta, con especial reforzo na captación de investimento directo estranxeiro. Por outro lado, a Xunta está a realizar unha campaña de promoción nos canais de distribución das diversas fórmulas de transporte multimodal, e tratando de producir sinerxias para a mobilidade de todo tipo de mercadorías, en colaboración coas Autoridades Portuarias e a Zona Franca de Vigo. Asimesmo, dende o departamento autonómico están a valorar a posible celebración en Monforte dun Foro loxístico do transporte multimodal, en liña coa axudas as empresas e asociacións para a súa asistencia e participación e foros internacionais de loxística.•

A Deputación anima a Feijóo “a seguir copiando as políticas de Besteiro” no abaratamento das parcelas dos polígonos

Ó día seguinte á posta en servizo da primeira fase do Porto Seco, a deputada de Economía, Recadación e Facenda, Pilar García Porto, lembrou que a Deputación de Lugo “leva tres anos pedíndolle a Feijóo que aplique medidas que poñan fin a esa imaxe de polígonos baleiros da Xunta, e polo que se ve en Monforte, parece que atende ás nosas peticións”. García Porto lembrou que dende 2011 o organismo provincial vén reclamando ó Goberno galego unha rebaixa nos custes do seu solo, xa que mantén prezos de ata 110 euros por metro cadrado, como no polígono das Gándaras, en Lugo, “impedindo o asentamento empresarial e a xeración de emprego”. A deputada criticou que a Xunta acumule nos seus polígonos 2,8 millóns de metros cadrados baleiros, e unha débeda de 261 millóns en Xestur. García Porto apuntou que a Deputación abaratou os prezos do seu solo ata acadar unha media de 35 euros por metro cadrado, e puxo en marcha unha medida pioneira que permite que os emprendedores poidan financiar no mesmo paquete a compra da parcela e a construción das instalacións. •

Deixa unha resposta

Your email address will not be published.

Nova Anterior

O renovado miradoiro de Santiorxo, en Sober, poderase ver no próximo spot promocional de Turgalicia

Seguinte Nova

A Coral Renfe actuou en Escairón

Últimas noticias sobre ECONOMÍA

A %d blogueros les gusta esto: