O día 8 de marzo conmemorouse o Día Internacional da Muller, que en Quiroga se celebrou con diversos actos ó longo do día. Pola mañá, a Casa Consistorial acolleu a presentación do III Plan de Igualdade entre Homes e Mulleres, a cargo das concelleiras de Educación, Benestar e Igualdade, Ana Núñez García, e de Cultura, Mª Dolores Sánchez Durán.
A continuación, tivo lugar no Concello de Quiroga unha recepción oficial dos participantes no obradoiro de teatro financiado pola Secretaría Xeral de Igualdade da Xunta de Galicia, que recibiron un agasallo conmemorativo de mans das responsables municipais de Igualdade e Cultura. O acto rematou coa posta en escea da obra “Avós, nunca é tarde” no Auditorio Municipal de Quiroga, por parte dos asistentes ó obradoiro de teatro.
A xornada conmemorativa do Día Internacional da Muller rematou coa celebración da 1ª Cea de Confraternidade de Mulleres, co obxectivo de rendir unha homenaxe ás mulleres da comarca de Quiroga. A cea, que contou coa participación de máis dunha trintena de mulleres, foi organizada pola Concellería de Educación, Benestar e Igualdade a través do CIM, e coa colaboración da Asociación de Mulleres San Martiño. As asistentes foron obsequiadas cun agasallo conmemorativo desta celebración.•
