Cunha concentración en Lugo
O sector de vacún de carne está a levar a cabo unha campaña informativa sobre a situación que atravesan os produtores de razas autóctonas en réxime extensivo, logo de que a Xunta de Galicia aplicara sucesivos recortes nas axudas iniciadas polo Goberno bipartito en concordancia coas políticas da Unión Europea de apostar pola produción de alimentos sans e de calidade. Según denuncian dende a Federación Rural Galega-FRUGA, estes recortes comezaron ó chegar o Partido Popular ó Goberno da Xunta, cunha diminución en 2011 dun 45% respecto da cantidade inicial do 2008, e continuaron en 2012, cando preto do 75% das solicitudes de renovación quedaron fóra das axudas, aínda que os produtores estaban a cumprir as condicións do compromiso para a concesión destas subvencións. Estas achegas supoñían o pago, por parte da Consellería de Medio Rural, de ata 156 euros anuais por animal reprodutor, e a cambio, os gandeiros comprometíanse a cumprir medidas que fomentaban as razas autóctonas en base á superficie.
ALERTAN CONTRA A REFORMA DA PAC
Para protestar por esta situación, a Federación Rural Galega-FRUGA iniciou unha campaña informativa para instar a todos os afectados a recurrir esta resolución do Goberno galego, e a sumarse á concentración que tivo lugar o 18 de marzo diante da Delegación da Xunta en Lugo, por ser esta a provincia máis afectada. Durante a mobilización, o presidente de FRUGA, Xurxo Álvarez, e o responsable de sectores gandeiros deste colectivo, Elías Somoza, denunciaron os retrasos na resolución destas axudas, e o feito de que a súa resolución só se comunicara a través do Diario Oficial de Galicia, así como a existencia de erros en moitas das aprobacións, o que amosa “a situación de indefensión na que se atopan os afectados”. Dende FRUGA criticaron a “agresividade da Xunta contra o vacún de carne”, manifestada nos “continuos recortes e posterior non renovación do Contrato de Explotación Sustentable (CES), a paralización do Banco de Terras, e a falta de defensa dos intereses das granxas galegas na próxima reforma da Política Agraria Común (PAC). Denuncian que a nova PAC vai supoñer “menos ingresos”, sumada á “constante suba dos custes de produción e ó conxelamento dos prezos que reciben os labregos”.•
