Aforro enerxético a partir de estratexias conxuntas entre varios concellos
O proxecto de eficiencia enerxética que están a desenvolver de xeito conxunto os concellos de Pantón, Sober e O Saviñao permitirá un aforro de preto de 13.000 euros anuais no total das facturas eléctricas dos tres municipios. Así o explicou o director xeral de Enerxía e Minas, Ángel Bernardo Tahoces, durante a súa visita a O Saviñao para coñecer os traballos de mellora da iluminación pública realizadas dentro deste proxecto mancomunado. Según precisou Bernardo Tahoces, o aforro en cifras económicas para os tres concellos achégase ó 70%, co que Pantón aforrará 6.700 euros ó ano, Sober, preto de 4.000 euros, e O Saviñao máis de 2.000 euros. En canto ó gasto enerxético, este programa permite ós tres concellos aforrar 92.000 KWh ó ano, e as emisións de CO2 á atmosfera redúcense en algo máis de 60.000 kg anuais, cifra equivalente á plantación de máis de 3.000 árbores.
Bernardo Tahoces visitou estes traballos acompañado polos alcaldes dos tres concellos integrantes desta asociación municipal, e salientou a importancia dun proxecto de colaboración que ten permitido “mellorar a eficiencia enerxética das tres vilas” contribuíndo a diminución dos custos na súa factura eléctrica. “A través desta actuación contribuímos ao aforro enerxético dos concellos nunha das súas partidas máis destacables, tendo en conta que a iluminación pública supón, de media, case o 70% do consumo eléctrico dun municipio”, explicou. O director xeral recordou o éxito alcanzado por este programa nos últimos anos, mobilizando desde o 2009 máis de 23 millóns de euros en diversos actuacións de eficiencia enerxética, contribuíndo á mellora da iluminación pública de 170 concellos galegos. Ante estes datos, a Xunta abriu este ano unha nova convocatoria, que incrementou o seu orzamento nun 15% ata chegar aos 4,5 millóns. •
