Na zona centro da nosa provincia, o aumento de viaxeiros foi do 10,2%, e na Mariña lucense medrou un 24,6%

O pasado 2 de abril, a directora de Turismo de Galicia, Nava Castro, explicou na comisión sexta de Industria, Enerxía, Comercio e Turismo do Parlamento galego as iniciativas do seu departamento dentro do marco do Plan Integral de Turismo de Galicia, así como os datos turísticos rexistrados na Comunidade.

UN 4,9% MÁIS DE VIAXEIROS E UN 1,9% MÁIS DE PERNOCTAS NOS ESTABLECEMENTOS HOTELEIROS

A directora de Turismo de Galicia incidiu no feito de que o ano 2013 rexistrou un balance “positivo” para o turismo galego, posto que nos establecementos hoteleiros medraron os viaxeiros un 4,9% e as pernoitas un 1,9% respecto dos valores rexistrados en 2012. No caso do conxunto da oferta regrada, experimentáronse subas do 4,3% en viaxeiros e do 1,4% en pernoitas. Nava Castro aportou os datos por provincias e zonas turísticas, e destacou o aumento de viaxeiros na Ribeira Sacra, cun 9,1% máis; en Lugo central, cun 10,2% máis; ou na Mariña Lucense, cun 24,6% máis de viaxeiros que en 2012.

MÁIS VIAXEIROS TAMÉN NOS DOUS PRIMEIROS MESES DE 2014

A responsable de Turismo na Xunta lembrou os datos do Instituto Nacional de Estatística sobre a ocupación no conxunto da oferta regrada de Galicia, e destacou o incremento do 4,3% na cifra de viaxeiros aloxados en febreiro deste ano e o incremento da estadía media do 11,4% nos establecementos extrahoteleiros no mesmo mes. Ademais, resaltou a mellora nese segundo mes de 2014 da rendibilidade empresarial nos establecementos hoteleiros, cun incremento do 3,3%. De igual modo, suliñou o incremento do gasto turístico estranxeiro por enriba do 28% nos dous primeiros meses de 2014.

POTENCIACIÓN DOS PRODUTOS TURÍSTICOS “ENDÓXENOS”

Nava Castro defendeu a potenciación de produtos turísticos baseados nos valores endóxenos, como o Camiño de Santiago, o patrimonio natural ou cultural, a gastronomía ou o termalismo. Referiuse ademais a produtos como os Trens Turísticos de Galicia, o Viñobús, as Rutas dos Viños de Galicia ou a rede de Centros BTT, exemplos do turismo de experiencias que se poden practicar en Galicia de xeito sostible na natureza.•